'Aita Mari'-ren lana babestu dute zenbait kristau elkartek
Espainia eta italiar estatuen jarrera bidegabea salatu dute eta minutu bateko isilunea eginez, Mediterraneoan zendutako migratzaile guztiak omendu dituzte.
Gipuzkoako hainbat kristau elkartek hartu dute parte Donibaneko elkarretaratzean. Hamarnaka lagun bildu dira Donibaneko kaian, Aita Mari ontziaren alboan, Itsas Salbamendu Humanitario erakundeari sustengua adierazteko. Azkoitiko Esku Bidez Taldeak eta Pasai Antxo, Donibane, Deba eta Azkoitiko parrokiek deitu dute elkarretaratzera, zentzugabekoa iruditzen baitzaie bizitzak salbatzen dituztenak kriminalizatzea. Haiek ozen esan dute “A¡ta Mari-ren alde” daudela eta konpromisorako borondatea agertu dute.
Arantxa Huarte, Caritaseko kide antxotarrak italiar eta espainiar estatuen jarrera bidegabea gogor salatu du, “ez dugu gizakiak erreskatatzea galarazten duten estatuen konplizeak izan nahi”. Aurten dagoeneko 598 migratzaile Mediterraneo Itsasoan ito direla oroitarazi du Huartek eta estatuen utzikeria jo du erantzule gisa, “legeak ezin dira inoiz erabili pertsonen eta hauen eskubideen aurka. Legeek ezin dute inoiz, zilegitasunez, heriotza eragin”.
Huartek gainera, Azkoitiko parroko Felix Azurmendirekin batera, Frantzisko Aita Santua migratzaileak erreskatatzen dituzten GKEen alde agertu dela nabarmendu du. Ekainaren 5ean, ISHko arduradunek Aita Santuarekin bildu ziren Vatikanoan. Hark ere haien lana sustengatu eta berdin jarraitzeko eskatu zien.
Bertaratutakoek, bat egiten dute Frantziskoren mezuarekin, hori dela eta haien elkarteetan Aita Mari eta ISH laguntzen jarraitzeko konpromisoa hartu dute. Era berean, euskal erakunde publikoei eskerrak eman dizkiete Aita Mari-ri babesa emateagatik. Bukatzeko, mezu zuzena igorri diete Euskal Herriko gotzainei, “Aita Mari eta ISH jendaurrean sustengatu eta diruz lagundu ditzatela eskatzen diegu, Frantziskok esandakoarekin bat egitea”.
Adierazpenak irakurri ondoren, minutu bateko isilunea egin dute, hildako migratzaileen omenez.
