Donosti Cup, Plazetan
Donosti Cup nazioarteko futbol txapelketaren 40 bat partida jasoko ditu Plazeta futbol zelaiak gaur hasi eta ostiralera bitartean.
Plazetan, Donosti Cupen partida bat (artxiboko irudia da). Gaur hasi da Donosti Cup nazioarteko gazteen futbol txapelketa. Aurreko urteetan bezala, Lezoko Plazeta futbol zelaiak partidak jasoko ditu, 40 bat denera. Hala, gaur, bihar, asteazkenean ligaxketako lehiak izango dira Lezon. Ostegunean nahiz ostiralean, final-hamaseirenetako, final-zortzirenetako eta final-laurdenetakoak ere jasoko ditu Plazetak.
Ligaxkako partidei dagokionez, gaurko (astelehena) 09:00etan abiatu dira lehiak. Egun osoan zehar, orduro partida bat izango da. Gaurko azkena 17:00etan da. Bihar (asteartea) eta etzi (asteazkena), 10:00etan izango dira lehen partidak, 19:15ean azkenak.
Besteak beste, Euskal Herriko, Kataluniako, Portugalgo, AEBtako, Frantziako, Espainiako edo Uruguaiko taldeek ezagutuko dute Lezo futbolaren bitartez, herrialde horietakoak baitira Plazetan jokatuko duten talde gehienak.
