Madalen aurreko kontzertua Landarbasoren eskutik
Hilaren 21ean Indonesiara doa abesbatza lehiatzera. Bertan egingo duen programa interpretatuko du igandeko kontzertuan, eta emanaldi zaila bezain ederra izango dela iragarri dute.
Iraeta, Uranga eta Tolaretxipi gaurko aurkezpenean. Madalenak aurreko kontzertua egingo du Landarbaso abesbatzak igandean Madalenaren ermitan eta gaur aurkeztu dute Maria Magdalenaren Lagunak Kultur Elkarteko Miguel Iraeta eta Lourdes Urangak eta Landarbaso abesbatzaren zuzendari Iñaki Tolaretxipik. Duela 28 urte hasi zen Landarbaso abesbatza kontzertu hori egiten, eta hutsik egin gabe errepikatu du urtero zita herritarren gozamenerako.
Tradizio bihurtu dela madalenen bezperako kontzertua esan du Tolaretxipik, “28 urte beteko ditu aurten eta urtero aritu gara”. Aurtengoa inoiz Landarbasok aurkeztu duen programarik zailena izango dela igandekoa zehaztu du Tolaretxipik. Izan ere, abesbatza Indonesiara doa hilaren 21ean, lehiatzera, eta bertarako prestatu duen programa ekarriko du ermitara igandean, “zailena bai, baita dibertigarriena ere”. Abesbatza mistoen eta erlijio musikaren ataletan parte hartuko dute Indonesiako lehiaketan, eta horrenbestez, halako doinuak entzuteko aukera izango da ermitan.
Kontzertuak bi zati izango dituela azaldu du, “Indonesiako programa osoa egingo dugu, lehenik erlijio musika eta ondoren abesbatza mistoak egingo ditugu. Bigarren zatia berriz, publiko guztiei begirakoa izango da. Zaila izango da programa, baina uste dut atsegina ere izango dela entzuleentzat”. Sei obra abestuko dituzte. Juan Gutierrez Padillaren Deus in adiutorium meum intende, Lorenzo Donatiren Si Cut Cervus, eta Vitaustas Miskinisen Pater noster erlijio musika arloan, eta Alessandro Cadarioren Lau teilatu kantaren egokitzapena, Ken Stevenen Down and dusk II, eta Laura Jakobsoneren Div Dujinas Gaisa Skreija.
Gogotsu daudela hainbeste entsegu ostean publiko aurrean egiteko emanaldia esan du Landarbasoren zuzendariak, “lehiaketan dena buruz egin behar dugu eta abeslariek nahiz eta etxean entseguak egin, entrenatu egin behar dute. Entrenamendu egokiena zuzenekoa da, eta igandekoa horretarako baliatuko dugu lehiaketara joan aurretik. Zuzenekoak abesbatza zein egoeratan dagoen erakutsiko digu. Erronka da”.
Ordubeteko iraupena izango du emanaldiak eta egiten dituztenen artetik hurbilena dela dio, “publikoa metro batera dugu ermitan eta abeslariek oso gustura abesten dute”.
19:00etan zabalduko dituzte ateak kontzerturako, eta 19:30ean hasiko da emanaldia.
