Umezurtz gelditu da Mindara
Pasa den ostiralean zendu da Mikel Izagirre Anabitarte, Mindara elkarteko presidentea. Lan eskerga egin zuen Izagirek dibertsitate funtzionala dutenen inklusioaren alde, baita haien bizitza kalitatea hobetzeko ere.
Mikel Izagirre HITZAren artxiboko irudi batean. Mikel Izagirre Anabitarte zendu da (Donostia, 1952-Errenteria, 2019) ostiralean. Mindara elkarteko presidentea, ezaguna batez ere dibertsitate funtzionala duten pertsonen inklusioaren alde egin zuen lan eskergagatik. Donostiako Gros auzoko Korta kalean jaioa, ezkondu zenean iritsi zen Errenteria-Oreretara. Frantses irakasle lanetan aritu zen lehenik, eta ONCEren kupoiak saltzen ondoren. Azken horretan are ezagunagoa egin zen. Aralar plazako postuan aritu zen lehenik, eta Morrongilleta kalean, ondoren.
Batez ere, elbarritasunak dituzten pertsonen alde egindako lanarengatik izan da ezaguna. Gurpildun aulkian mugitzen zen bera, lehen eskutik ezagutzen zuen dibertsitate funtzionala, baita egunerokoan topatzen dituzten oztopo eta zailtasunak ere, eta horren harira, 2011n Mindara elkartearen sortzailea izan zen, eta presidentea. Aurretik, elbarritasuna duten pertsonen koordinadoraren lehen presidentea izan zen, Behobia-Donostia lasterketan gurpildun aulkietako lasterketaren sustatzailea, oztoporik gabeko bainuaren bultzatzailea… Inklusioaren alde egin duen lana handia izan da, eta ezinbestekoa.
2014an EMKEren Musika Bandarekin batera madalenei hasiera eman zien txupina piztu zuen Izagirrek. Bere lanari aitortza egin zion herriak orduan, eta pasa den apirilean, GaituzSport saria jaso zuen kirol inklusiboaren alde egindako lanagatik. Tartean aitortza gehiago egin zizkioten.
Umezurtz gelditu zen ostiralean Mindara elkartea. Ziur, baina, bidean, arrastoa utzi duela Izagirrek, ez nolanahikoa gainera, eta Mindara elkartean ari diren boluntarioek segituko dutela inklusioaren alde lanean dibertsitate funtzionala duten pertsonen bizi kalitatea hobetzeko, berak hasitako bidetik.
