Irina eginez, erribera kate jolasa, eta ibaiko altxorrak Fanderiako Errotan
Udaran eskaintza berezia izango du Fanderiako errotak, eta ingurumena eta kultura uztartzen dituzten ibai inguruko jarduera bereziak eskainiko ditu.
Fanderiako Errota-Ibaiaren Etxeak larunbatean zabalduko ditu ateak. Udaran eskaintza berezia izango du Fanderiako errotak, eta ingurumena eta kultura uztartzen dituzten ibai inguruko jarduera bereziak eskainiko ditu. Errotan bertan zein ibai ertzean garatuko ditu jarduera horiek. batetik, Irina eginez jarduera egingo dute hilaren 14an eta 28an eta abuztuaren 15 eta 25ean. Errotako errotarriak martxan jarriko dituzte artoa txikitu eta bertaratzen direnek arto irina eskuratzeko aukera izango dute.
Hilaren 21ean, berriz, haurrei zuzenduta erribera kate jolasa egingo dute Fanderiako errotan. Jokaoren bidez, ekosistema horrek duen garrantzia azalduko diete parte hartzaileei. Azkenik, irailaren 1ean, ibaiko altxorrak jarduera egingo dute familiei zuzenduta. Guraso zein haurrei zentzuen bidez erriberako ingurumena ezagutu eta baloratzeko tresnak bertan eskainiko dizkiete.
Jardueretan parte hartzeko ezinbestekoa da aurretik izena ematea 943 494 521 telefono zenbakira deituta edo posta elektronikoaren bidez. Doakoak dira eta euskaraz edo gazteleraz egin daitezke.
Urtebete zabalik
Fanderiako Errotak urtebete egin du zabalik Ibaiaren Etxea Fanderiako Ibai Interpretazio Zentro gisa,. Oiartzun eta Urumea ibaien ekosistemak Errenteriari emandako onurak eta historian errotaren erabilerak azaltzeko erakusketa iraunkorra dago. Asteburu eta jai egunetan 10:00etatik 14:00etara bisita daiteke. Bi ikus entzunezko eta hainbat panel daude bertan eta gida batek errotarriak martxan jarri eta ibaiaren ondare natural eta kulturalaren gaineko informazioa emango dio bisitariari. Egun zehatzetan, bisita gidatu bereziak egiteko aukera dago, gainera.
