[Galeria] Trintxerperen txanda, karmenak hasi dira
Danborradak dardarka utzi du Trintxerpe Karmengo Amaren Jaien hasieran. Zuriak eta urdinak irauten duten bitartean jaiak ez du etenik izango.
Txupina lehertu eta berehala hasi da danborrada. Arrantzalez jantzita atera dira gaur ehunka trintxerpetar, karmenak hasi diren seinale. Ez ohiko itxura hartu du Euskadi Etorbideak, jendearen iskanbilak ordezkatu du autoen zarata. 20:00tan bota dute txupinazoa eta igo egin dituzte Trintxerpeko bandera zein ikurrina. Jaiei ongi etorria eman bezain laster, hasi dira danborren burrunbak.
Berez, gizonezkoen danborrada izan arren, berdintasun aldarriek lekua izan dute. Hainbat neskek lehen ilaran jo dute danborra hainbat minutuz, danborrada geldirik zegoen bitartean. Jarraian ohiko ibilbidea egiten hasi da danborrada. Euskadi etorbidetik abiatuta, Jaizkibel kalea igo dute eta alboko kaletik, Azkuenetik, jaitsi. Gudari plazarako bidea hartu dute ondoren eta Serafin Esnaola plazan bukatu.
Hala ere, txupina lehertu orduko, Trintxerpen jaia hasia zen jada. 18:30tan batzuek jada botata zuten haien suziria. Haurrek haien txupinazo propioa izan dute eta Trintxerpen ohiko bihurtzen ari diren holi jai batekin ospatu dute.
18:45tan ordea, jaien hasiera ofizialarekin batera, plakak banatu dizkiete txupineroei eta bestelako trintxerpetar lagun eta elkarteei. 19:00tik aurrera, Errebal taldearen erromeriak txupinazoaren aurreko uneak girotu ditu Serafin Esnaola plazan.
HITZAk txupinazo eta danborradaren hainbat irudi bildu ditu.
