Alaia Martinek eta Ander Lizarraldek Gipuzkoako txapelketan hartuko dute parte
Gipuzkoako Bertso Txapelketako finalaurrekoetako bat Oiartzunen jokatuko dute, azaroaren 24ean. Lehia irailaren 14an hasiko da.
Gaur aurkeztu dute 2019ko Gipuzkoako Bertsolari Txapelketa. Irailaren 14an hasiko da, Oñatin, eta abenduaren 14an bukatuko da, Donostian.
48 izango dira parte hartuko duten bertsolariak. Tartean izango dira Alaia Martin —finalista izan zen duela lau urte— eta Ander Lizarralde oiartzuarrak. Jon Martinek ez du parte hartuko, nahiz eta berez sailkatuta zegoen, familiari tarte gehiago eskaintzeko. Parte hartuko duten 48 bertsolarien zerrenda ikusteko, egin klika esteka honetan.
Oiartzunek ez du bertsolarien bitarteko presentzia bakarrik izango. Txapelketako hiru finalaurrekoetako bat Elorsoro kiroldegian jokatuko dute, azaroaren 24an.
Honakoa izango da saioen zerrenda:
Final-zortzirenak:
- Irailak 14 (larunbata), Oñatiko Santa Ana antzokian.
- Irailak 15 (igandea), Amasa-Villabonako Gurea antzokian.
- Irailak 21 (larunbata), Ordiziako Herri antzokian.
- Irailak 28 (larunbata), Zumarraga-Urretxuko Zelai-Arizti aretoan.
- Irailak 29 (igandea), Elgoibarko Herriko antzokian.
- Urriak 5 (larunbata), Lasarte-Oriako Manuel Lekuona kultur etxean.
Final-laurdenak:
- Urriak 19 (larunbata), Andoaingo Bastero kulturgunean.
- Urriak 20 (igandea), Irungo Amaia Kultur zentroan.
- Urriak 26 (larunbata), Eibarko Coliseo antzokian.
- Urriak 27 (igandea), Azpeitiko Soreasu antzokian.
- Azaroak 2 (larunbata), Azkoitiko Baztartxo antzokian.
Finalaurrekoak:
- Azaroak 17 (igandea), Arrasateko Uarkape pilotalekuan.
- Azaroak 24 (igandea), Oiartzungo Elorsoro kiroldegian.
- Abenduak 1 (igandea), Tolosako Usabal kiroldegian.
Saio guztiak 17:00etan hasiko dira. Irailaren 2an jarriko dira salgai www.bertsosarrerak.eus webgunean, eta saioen egunetan ere eskuratu ahal izango dira, aretoetan bertan.
