1936ko uztailean gertatutakoak gogoraraziko dituzte, ez ahazteko
Oroimenaren Astea izango da datorrena. Erakusketa bat, hitzaldi bat eta 1936an udalbatza osatzen zutenei aitortza ekitaldia prestatu dituzte.
Aurrean, Kattin Txikiko Joxe Kruz Ezeiza 'Kaxka' eta Joxan Mitxelena, Jexux Leonet alkatea erdian dutela; atzean EAJko Janire Mitxelena eta EH Bilduko Eneritz Arbelaitz. Kattin Txikiko ordezkariek eta udaleko bi talde politikoetako ordezkariek —Jexux Leonet alkatea barne— Oroimenaren Astea aurkeztu dute gaur goizean. Leonetek berak gogorarazi duenez, badira urte batzuk Kattin Txiki eta Oiartzungo Udala elkarlanean ari direla memoria historikoa berreskuratzeko.
Tropa faxistak 1936ko uztailaren 27an sartu ziren Oiartzunen, eta hauteskundeetan hautatutako udalbatza egotzi zuten, eta zortzi errepresaliatu zituzten, guztiak abertzaleak. Ezkaba mendiko SAn Kristobal gotorlekuan espetxeratu zituzten, eta Leontzio Aranburu Agirre lehen alkateordea eta Manuel Irigoien Mitxelena bigarren alkateordea fusilatu zituzten, eta haien gorpuak desagerrarazi. Gainera, Segundo Berrondo zinegotziaren semea ere hil zuten.
Feliciano Belderrain alkateak, eta Jeronimo Ugaldebere Labandibar, Esteban Goienetxe Arozena, Luziano Aristizabal Etxeberria eta Jose Ignacio Odriozola Oiartzabal zinegotziek osatzen zuten 1936ko udalbatza hura. Haiei ere, espetxealdiaz gain, erakutsi zizkieten errepresioaren beste hainbat aurpegi ilunak.
Erakusketa, hitzaldia eta aitortza
Ezkabako gotorlekuan gertatu zirenekin erakusketa egingo dute larunbatean hasi eta hilaren 28ra bitartean, Lur azpitik lur azalera izenburupean. Igandean, 11:00etan, hitzaldia emango dute, erakusketaren xehetasunetan sakontzeko.
Astelehenerako —hilak 22— hitzaldia prestatu dute. 19:00etan hasiko da. Lourdes Herrasti Aranzadiko antropologoak 1936ko altxamendu faxista genero ikuspegi batetik aztertuko du. Gainera, Aiako Harria Gaztelumendik memoria lantzen duen Oroimenaren harra unitate didaktikoari buruzko azalpenak emango ditu. Oiartzun Azmarrin-ekin elkarlanean aritu dira.
Hilaren 27an, berriz, 1936ko udalbatza omenduko dute. Zortzi zinegotzi errepresaliatuei aitortza ekitaldi xume eta intimoa egingo diete.
