Sistiaga Eneako teilatua kentzen ari dira
Sistiaga Enean lanean ari dira. Lezoko Udalak jakinarazi du Sistiaga Enea etxeko teilatua kentzen ari dela. Kale Nagusiko eraikineko teilatua egoera eskasean dago, eta balizko istripuak ekiditeko, segurtasun neurri bezala ari dira teilatua kentzen. Zaharkitua dago oso etxe historikoaren goialdea. Udalak adierazi du lanak uztailean zehar burutuko direla.
Aldi berean, bertan etxebizitzak eraikitzeko asmoa dagoela zehaztu du udalak. “Udalak horiek eraikitzeko urratsak egiten jarraitzen du, eta eraikitze lan horiek aurrerago egingo dira”.
Utzita dago Sistiaga Enea. Horregatik, 2010ean, etxerik gabe eta langabezian zeuden gazte batzuk eraikina okupatu zuten. 2010eko agirietan agertzen denez, Sistiaga Enea Lezoko Hirigune Historikoa Birgaitzeko Plan Berezian dago. 2017aren erdialdean, berriz, eraikinaren gaineko hirigintza hitzarmena onartzeko proposamena landu zuten tokiko gobernu batzordean.
