[Bideoa eta galeria] Txupinak inoiz baino duinago egin du eztanda
Milaka herritarren aurrean, Duintasunako kideek piztu dute madalenei hasiera emateko txupina. Bandak ehungarrenez jo du 'Zentenarioa'
Hasi da festa. Hasi dira festak. Duintasuna jubilatu eta pentsiodunen elkarteko kideek piztu dute txupina zazpietan puntuan eta Herriko Plazan lehertu da festa. Bertsoa abestu dute pentsiodunek aurretik, eta balkoian ez da falta euren aldarrikapena, afixetan zein elastikoetan pentsio duinen aldeko aldarria zabaldu dute lau haizetara. Banda bikain, beti antzera, eta aurten 100. urtez jo dute Zentenarioa madalenei hasiera emateko.
Igandea izanik jendea erruz bildu da jaiei hasiera ematera giro paregabean; zikinkeria Herriko Plazan nahi baino gehiago, txupinazo garbiaren aldeko lana eta mezuak ez dute lortu, momentuz behintzat, irina, ketchupa eta mostaza plazatik kanpo gelditzea, eta madalena batzuk ere ikusi dira tartean hegan.
Paregabea giroa plazan, polita giroa balkoian txupina pizteko garaian, eta ederra ere pleno aretoan: alkateak, eta hainbat zinegotzi eta herritarrek dantzan hasi dituzte jaiak. Esan zuten Kukai Dantzako kideek duela urte pare bat: ‘dantzatzen duen herria ez da inoiz hilko!’.
Aurretik bost egun, 25 kontzertutik gora, eta 130 ekintza baino gehiago, herritik eta herriarentzat sortuak.
