[Galeria eta bideoa] Enbata etorri da, eta gorria izan da
Kuadrillen Eguna bero sapak tiranizatuta ospatu dute dute gaur madalenetan. Ehunka pertsonek kolore gorriz jantzi dute Errenteria-Orereta.
Madalena kalea harrapatu du enbata gorriak. Pentsa liteke Kuadrillen Eguna beti berdina dela, eta kamiseten kolorea bakarrik aldatzen dela. Pentsa liteke errepikakortasun horrek xarma kentzen diola. Pentsa liteke mainstream-aren olatuak harrapatu duela uztailaren 23a. Baina irizpide propioa edukitzeak ez du esan nahi zuzen egongo zarela.
Eguzki izpien zartailupean ospatu da 2019ko Kuadrillen Eguna. Horrelako bero lamadak jateko gogoa uxatzen du, ez ordea edatekoa. Urtero bezala, bazkaldu ondoren, poteo jendetsua egin dute kamioiaren atzetik. Egiari zor —errespetu osoz, betiere—, lan handiagoa izan dute txosna mugikorra kudeatu dutenek kamioiaren gainean musika pintxatu dutenek baino. Abesti berriak eta klasikoak uztartu dituzte. Hori bai, zalantza daukagu Hemendik At! taldea non sartu. Gazteek ebatzi dezatela.
Urtero bezala —hau ere bai— Sindikato tabernan geldialditxoa egin du segizio gorriak. Unerik zirraragarrienetako bat han bizitu da, koloreetako euria —urre kolorea tartean— balkoietatik erori denean.
Herriko Plazara iristean, Xanti eta Maialen erraldoiek dantza egin dute —txalo bat mugiarazten dituztenentzako—. Alkate aldaketa egon da aurten, eta ikusmina zegoen Aizpea Otaegik zer egiten zuen. Alpargatak alde batera utzi ditu, mikrofonoa hartu eta segidilla bat kantatu die parrokiako eskaileretan pilatu direnei, gobernu taldeko kideekin batera. Zinegotziren bat edo bestek, zorionez, kuadrilletakoak animatzera eskaini dituzte beren indarrak. Jon Maia bertsolariak, badirudi, arrastoa utzi duela herrian, eta ez bakarrik iritzi artikulu formatuan.
Plazatik Lino aldera jo dute, eta hor bukatu da urteroko desfilea. Bukatu esatea askotxo da, gaua luzea baita. Hori bai, auskalo kuadrillek elkarrekin bukatzen duten ala norbaitek zorterik izan duen endogamiatik jauzi egiteko. Badaezpada ere, ez dugu hemen kontatuko.
