San Agustin Eguna ospatuko dute Artikutzan, etzi
Goizuetako lurretan eta Donostiako administraziopean egon arren, oiartzuar andana hurbiltzen dira bertako festara. Goizez eta arratsaldez egingo dute.
Etzi berriro festa egingo dute. Abuztuaren 28a izango da etzi, eta urtero bezala, Artikutzan festa giroa nagusituko da. Goizuetako lurretan dago, Donostiako Udalaren administraziopean, baina oiartzuar asko —baita eskualdeko beste herrietako jende asko ere— hurbiltzen dira bertara.
San Agustinen omenezko mezarekin hasiko da egitaraua, 11:00etan. Ordu erdira, pilota partidak hasiko dira auzoko frontoian, Oiartzun eta Goizuetako taldeek antolatuta.
Arratsaldean, 17:30ean hasita, herri kirolen erakustaldia egingo dute. Gabezin taldeak, berriz, dantzaldia eskainiko du 19:30ean hasita.
Ordu zehatzetatik harago, egun osoan zehar txosnak egongo dira, jana eta edana erosteko. Gainera, Artikutzaren historia laburbiltzen duen erakusketa ezarriko dute. Aurten, gainera, ehun urte bete dira Donostiako Udalak lursaila erosi zuenetik, ur hornidura hobetzeko asmoz.
