Larruzko paletako, errebote eta bote luzeko txapelketak hasiko dira
Ostegunean Errenteria-Oreretan jokatuko dute partida bat, etxeko moduan, eta ostiralean Madalensoron beste hiru jokatuko dituzte.
Enrike Arbil txapelketaren 56. ekitaldia izango da. Kirol taldeentzako denboraldia hastear da. Asteburu honetan, bi pilota modalitateko txapelketak hasiko dira.
Txost pilota elkarteko kirolariek aste honetan hasiko dute Gipuzkoako Larruzko Paletako Txapelketa. Lehenengo partida Errenteria-Oreretan izango da, ostegunean. Lehen Mailako partida izango da, eta Txostekoek etxeko moduan jokatuko dute, nahiz eta arerioak errenteriarrak izan.
Jakinarazi dutenez, EPLErekin adostu dute eguna eta ordutegia, pilotarien ordutegi arazoak direla eta. Partida 18:15ean hasiko da, Agustina Otaola pilotalekuan.
Ostiralean beste hiru partida jokatuko dituzte. Kasu honetan, Madalensoro pilotalekuan izango dira, 19:00etan hasita. Bigarren Mailan, Txost 1 eta Txost 2k EPLE eta Altzatarra jasoko dituzte. Hirugarren Mailako partida, berriz, Txost eta Oianguren artekoa izango da.
Bote luzeko txapelketa
Ostiralean ere bai, Euskal Herriko Bote Luzeko Txapelketa hasiko da Beheko Plazan, Gipuzkoa Bat eta Iparralde Bat taldeen partidarekin. 19:00etan hasiko da norgehiagoka. Biharamunean, Bizkaia eta Gipuzkoa Bat taldeek Berrizen (Bizkaia) neurtuko dituzte indarrak, 18:30ean hasita.
Guztira, sei taldek hartuko dute parte txapelketan. Aipatutako lau taldeez gain, Iparralde Bi eta Iparralde Hiruk osatuko dute koadroa.
…eta errebotea
Datorren asteburuan hirugarren txapelketa bat hasiko da: Enrike Abril Errebote Txapelketa. Jokatuko duten 56. aldia izango da.
Zortzi taldek hartuko dute parte: Gipuzkoako Behar Zana, Txost eta Zubieta, Lapurdiko Kanboarrak, Luzean, Noizbait eta Sarako Izarra, eta Nafarroa Behereko Zaharrer Segi. Bi multzotan banatuko dituzte zortzi taldeak (ikus behean), eta joaneko partidak jokatuko dituzte, asteburu honetan hasi eta hilaren 22ra arte. Oiartzun, Villabona eta Zubietako plazetan jokatuko dituzte partida guztiak.
Ondoren, kanporaketen fasea etorriko da. Bi finalerdi jokatuko dituzte, lehen fasean multzo bakoitzeko ligaxkan aurreneko bi postuetan sailkatutako taldeak gurutzatuz. Hilaren 29ko asteburuan izango dira ikusgai finalerdiak.
Finala, berriz, urriaren 6an jokatuko dute, Villabonako plazan. Hori bai, txapelketa osoan zehar eguraldia lagun izan behar dute aurreikusitako datak betetzeko.
A multzoa
- Zubieta (Zubieta, Gipuzkoa).
- Behar Zana (Villabona, Gipuzkoa).
- Noizbait (Hazparne, Lapurdi).
- Zaharrer Segi (Baigorri, Nafarroa Beherea).
B multzoa
- Luzean (Donibane Lohizune, Lapurdi).
- Kanboarrak (Kanbo, Lapurdi).
- Sarako Izarra (Sara, Lapurdi).
- Txost (Oiartzun, Gipuzkoa).
