Integrazioa eta ahalduntzea, jostorratzarekin lotuta
'Josiz jabetu' ikastaroa emango dute, urritik abendura bitartean, Emakumeen Etxean. Tytti Thusberg diseinatzaileak eta Aran Erasunek parte hartuko dute.
Egilea: Camille Pissarro (1853). Urritik abendura bitartean, Josiz jabetu tailerra emango dute Errenteria-Oreretako Emakumeen Etxean. Izenak argi uzten duen bezala, joskintza eta ahalduntzea uztartu nahi dituzte tailerrean.
Ehungintzaren arloa Tytti Tusberg ekodiseinatzaileak gidatuko du. Slow fashion, kustomizazioan eta beste hainbat alorretan aditua da. Hilean behin, Aran Erasun Jabe programako zuzendariarekin ahalduntze saioak egingo dituzte.
Ostiraletan, 10:00etatik 13:00etara, izango dira saio horiek, Emakumeen Etxean. Izena eman nahi duenak, bertara deitu beharko du (943 48 34 70), eta tailerra doakoa izango da.
Lehenengo saioa, baina, hilaren 13an egingo dute, toki eta ordu berean. Aurkezpen ekitaldia izango da, eta necessaire bat sortuko dute.
Udalak diruz lagundutako tailerra da, integrazioa bilatzen duena. Jatorria Marokon duten 23 emakumek parte zuten iazko ikasturtean. Talde trinko bat osatu nahi dute aurten ere, ikastaroa abendutik harago luzatzeko bermea emango lukeena.
