[Galeria] Ostolaza herrian nahi dutela aldarrikatu dute, modu alaian
Herriko artista sorta batek Elkartasun Maratoian maratoian parte hartu du, baita herritar askok ere. Elkartasuna, hala ere, ez da eten.
Artisten ondoren, beste artista batzuek antolatu dute mosaikoa. Giro polita sortu da, gaur arratsaldean, Done Eztebe plazan, bertara hurbildu direnek elkartzeko motiboa bestelakoa izatea nahiko zuketen arren. 11/13 sumarioan auzipetuta dagoen Onintza Ostolazari babesa emateko Elkartasun Maratoia antolatu dute plazan.
Herriko artista ugarik bere ekarpena egin diote, eta ez dira gutxi izan hurbildu diren oiartzuarrak. Honakoak izan dira mikro aurrean —edo dantza egiten— jarri direnak: Ibargaingo musikariak, Maider Zabalegi, Olarri dantza taldea, Ekain eta Malen, Autobus Magikoko Gotzon, June Galardi, bertsolariak eta Beira.
Emanaldiak bukatu dituztenean, 47ak herrira iniziatibaren logoa marraztu dute lurrean, eta herritarrek eta artistek pixkanaka bete dituzte markatutako esparruak. Kartulina zuri eta urdinak banatu dizkiete, mosaikoa osatzeko.
Epaiketa hilaren 16an hasiko da, eta egun horretara bitartean, izango da beste elkartasun keinurik. Asteazkenean —hilak 11— Lur Kortak haurrentzako ipuin kontaketa saioa eskainiko du, 17:00etan hasita. Plazan izango da. Eta hurrengo larunbatean, manifestazioa egingo dute Bilbon. Bertara joateko autobusetarako zerrendak Kastro tabernan eta Garmendi txokolategian daude.
