Bide Berdearen Eguna ospatuko dute igandean, bizikleta ardatz
Bizikleta martxa batekin hasiko dute eguna, eta Arditurrin hamaiketakoa izango dute zain. Meategiak bisitatzeko aukera egongo da.
Aurtengorako ere eguraldi ona iragarri dute. Datorren igandean, hilak 15, Arditurriko Bide Berdearen Eguna ospatuko dute, 8. aldiz. Trenbide zaharra pasatzen zen bidetik gora bizikleta martxa pare bat egingo dituzte. Bat Oiartzungo Done Eztebe plazatik aterako da martxa horietako bat, eta bestea, Errenteria-Oreretako Gamon Zumarditik. Biak ala biak 10:00etan aterako dira.
Ibilbidearen zailtasun maila erraza da, beraz adin guztientzako egokia da bizikleta martxa hau. Kaskoa eramatea nahitaezkoa izango dela gogorarazi dute antolatzaileek eta argia eramatea gomendatzen da. Bizikleta martxan parte hartzeko 15 minutu lehenago egotea komeni da irteera puntuan.
Mugikortasunaren Astea denez, Arditurrira motordun ibilgailurik gabe hurbiltzea eskatu dute.
Arditurriko eskaintza
Bizikleta martxa meategietan bukatuko da, eta pedalak astintzen igo direnentzako hamaiketakoa prestatuko dute. Horrez gain, beste hainbat jarduera egiteko aukera egongo da.
Meategiak prezio murriztuan bisitatzeko aukera egongo da. Meategiko txartelarekin, seg-way zirkuitu batean ibili ahal izango da. 12:30etik 14:00etara, zinta karreretan, herri kiroletan edo bizikletentzako jolasetan parte hartzeko aukera egongo da.
Lehenago, 11:00etatik 12:30era, ingurumenarekin lotutako jolas tailer bat eskainiko dute. Horrez gain, Gurpil Artea elkarteak bizikleta elkarteak nola konpon daitezkeen erakutsiko du.
Arditurriko Bide Berdearen Eguna Oiartzungo Udalak eta Gipuzkoako Parketxe Sareak antolatu dute, herriko hainbat elkarteren laguntzaz: Lartaun Z.T.K.E., Girizia K.K.T. eta Ttak. Laguntzaile lanetan arituko dira Errenteriako Udala, Gurpil Artea elkartea, Irrisarri Land eta Kaiku.
