2020a, TKEren ligan Pasaiako trainerurik izango ez den lehen urtea
TKEren lehen liga 2003an izan zen. Ordutik, beti egon Pasaiako traineruren bat onenekin lehiatzen. 2020an, berriz, ez da bat ere izango.
Trintxerpe-Illunbek 2004 eta 005 urteetan parte hartu zue TKEren ligan. San Pedroren jaitsieraren ondoren, 2020an ez da Pasaiako trainerurik izango Traineru Kluben Elkarteak (TKE) 2003tik antolatzen duen ligan. Kantauriko arraun ligarik indartsuenean, alegia. Gogoetarako datua izanagatik, horren ondorioa izan daiteke arraunak azken urteetan izan duen aldaketa, eta harrobiko taldeek (denek ez) izaten dituzten gorabeheren isla garbia. Arrain handiak txikia jaten du. Arraunean ere horrela da.
San Pedro, San Juan eta Trintxerpe arraunarekin estu lotutako barrutiak izan arren, azken urteetan zailtasunak izan dituzte traineruak osatzeko hiru barrutietako klubek. Adibide bat: Trintxerpe-Illunbe Arraun Elkarteak azken urteetan ezin izan du gizonen trainerurik osatu, eta San Pedro nahiz San Juan azken sasoietan ia berritik hasi dira, ia zerotik, arraunlarien joan-etorriak oso nabarmentzekoak izan direlako. Horrek kalte nabariak eragin dizkie Pasaiako klubei, eta ezintasuna ere: ziurtasun ekonomikorik gabe, goi mailan aritzerik ez.
2003an antolatu zuen TKEk lehen liga. San Miguel Liga, eta egun Eusko Label Liga marka eraman dute azken urteetan. Horrela, bertan Pasaiako trainerurik izan gabe, litekeena da Pasaiako badian ere goi mailako ligaren estropadarik ez izatea 2020an. Hori konfirmatzeke dago, ordea.
Pasaitarren partaidetza TKEk antolatutako ligetan (urte horretako sailkapen nagusiaren ordenean):
- 2003: San Juan.
- 2004: San Juan. eta Trintxerpe.
- 2005: San Juan eta Trintxerpe (jaitsi egin zen).
- 2006: San Juan (jaitsi egin zen).
- 2007: San Pedro.
- 2008: San Pedro.
- 2009: San Pedro.
- 2010: San Juan eta San Pedro.
- 2011: San Juan eta San Pedro.
- 2012: San Pedro eta San Juan.
- 2013: San Juan eta San Pedro.
- 2014: San Juan eta San Pedro.
- 2015: San Juan eta San Pedro.
- 2016: San Juan eta San Pedro.
- 2017: San Juan eta San Pedro.
- 2018: San Pedro eta San Juan (jaitsi egin zen).
- 2019: San Pedro (jaitsi egin da).
