Ander Lizarraldek igandean hasiko du Gipuzkoako txapelketa
Zumaian jokatuko da final zortzirenetako saioa, igande arratsaldean. Beste bost bertsolarirekin batera arituko da, nor baino nor, oiartzuarra.
Ander Lizarralde Unai Muñoarekin, aurreko saio batean. Gipuzkoako Bertsolari Txapelketak pasa ditu final zortzirenetako bi saio, eta asteburu honetan izango dira hurrengo biak. Igandekoan Ander Lizarralde oiartzuarrak debuta egingo du, Zumaian.
Saioa 17:00etan hasiko da, Aita Mari zineman. Saroi Jauregik aurkeztuko du saioa, eta Lizarralderekin batera, beste bost bertsolari arituko dira: Beñat Jauregi, Gorka Maiz, Iñigo Gorostarzu, Jokin Bergara eta Unai Muñoa. Saioa irabazten duena zuzenean pasako da final laurdenetara, eta beste hamar bertsolarik saio guztiak bukatu arte itxoin beharko dute, hurrengo fasera pasako diren ala ez jakiteko.
Sarrerak erosteko, egin klik hemen. Honakoak izango dira sei bertsolariek egin beharreko lanak:
- Binaka, gaia emanda, zortziko handian hiruna bertso.
- Binaka, gaia emanda, zortziko txikian hiruna bertso.
- Bakarka: lehen puntua emanda, zortziko txikian bina bertso.
- Binaka, gaia emanda, hamarreko txikian hiruna bertso.
- Kartzela: bakarka, gaia emanda, nahi den doinu eta neurrian, hiruna bertso.
