Dagoeneko egin daitezke Itsas Festibalerako ekarpenak
Pasaiako Itsas Festibalaren bigarren edizioa 2020ko maiatzaren 28tik ekainaren 1era egingo da. Prozesu parte hartzailea izan dadin, festibalak kolektibo eta eragileen ekarpenak hartuko ditu urriaren 15era arte.
'Kaskelot' ontzi historikoak festibalaren lehen edizioan parte hartu zuen. Pasaiako badia, itsasontzi tradizionalen topaleku bihurtuko da bigarren aldiz 2020an. Maiatzaren 28tik ekainaren 1era, Pasaiako Itsas Festibalaren bigarren edizioa ospatuko dute iazko arrakastari jarraipena emateko asmoz. Bost egunez, Pasaiako kaiek Europa osoko ontzi tradizionalak hartuko dituzte.
Pasaiako Udalak, Oarsoaldeko Garapen Agentzia eta Albaola Itsas Kultur faktoria, Pasaiako eta inguruko eragileekin elkarlanean, festibala Pasaian errotzea nahi dute, herrian izan dezakeen eragin ekonomiko eta kulturala dela eta.
Eragile kultural, hezitzaile eta sozialek urriaren 15era arte egin ahalko dituzte egitaraua osatzeko proposamenak. Pasaiako Udalaren webgunean dauden fitxak bete ondoren eragile interesdunek proposamenak Oarsoaldeko Garapen Agentziara helarazi beharko dituzte, posta elektronikoz.
Antolatzaileek jakinarazi dutenez, ekarpen guztiak balioetsi eta aztertu ondoren, egitaraua osatzen hasiko dira.
