Errotak eta haien ondarea ezagutzeko aukera, Ondarearen Jardunaldietan
Fanderia, Ihurrita eta Arraskue errotak ezagutuko dituzte urriaren 5ean egingo duten ibilaldian. Bi hitzaldi ere antolatu dituzte 10erako.
Iurrita errota izango da ezagutuko duten bat. Garai batean hogei errota zeuden Oiartzunen, eta geratzen diren biak ezagutzeko aukera egongo da urriaren 5ean. Izan ere, Europako Ondarearen Jardunaldien barruan, ibilaldi gidatua antolatu dute urriaren 5erako.
Oiartzungo eta Errenteriako udalek antolatu dute txangoa, Oarsoaldeko Turismo sailarekin elkarlanean. Ihurrita, Arraskue eta Fanderiako errotak ezagutzeko aukera egongo da.
Bisita gidatua dohainik izango da, baina aldez aurretik eman beharko da izena, tokiak mugatuak direlako. 943 49 45 21 telefono zenbakira dei daiteke, edo turismo sailaren e-posta helbidera idatzi.
Hitzaldiak
Ibilaldi gidatuarena ez da ondare ezagutarazteko ekitaldi bakarra izango. Urriaren 10ean, bi hitzaldi antolatu ditu Oiartzungo Udalak, Oiartzungo Ondarearen Mahaiaren laguntzarekin.
Biak erroten historiari lotuak izango dira: Alvaro Aragon historialariak Artoa Oiartzunen: bertaratu zenetik orokortu zen arte (XVII-XIX. mendeak) eta Alex Roteta errotariak Gipuzkoako errotak: ondareari begirada bat izango dituzte hizpide, Ihurrita errotan, 19:00etan.
Horrez gain, datozen egunetan Yurrita errotaren historia eta funtzionamendua azaltzen duen panela eta Juansendo errota izandakoaren harri bat jarriko ditu Udalak bidegorrian, bertatik pasatzen direnek gure ondarearen puska hori ezagutu dezaten.
Ondarearen Mahaia
Oiartzungo Udalak urte hasieran sortu zuen Ondarearen Mahaia, herriko ondarea bildu eta ezagutarazteko asmoarekin.
Europako Ondarearen Jardunaldien aurtengo leloa Ondarea plazara! da, eta ideia horri helduta, Ondarearen Mahaiak ibaiko errotak plazara ateratzea erabaki du. Ondare baliotsu hori aintzatestea garrantzitsua dela baietsi dute.
