Hondakin bilketaren zerbitzuak kezkatzen du EAJ
Kudeaketaren defizita zaindu behar dela nabarmendu dute. Horrez gain, auzo batzarretara deia luzatu du Oiartzungo EAJk.
EAJko udal taldekoak, asteazkenean.
Ikasturteko lehen plenoa egin zuten asteazken arratsaldean, eta bertan, beste beste, 2020ko ordenantza eta tasak landu zituzten. Aho batez onartu zituzten, baina EAJren udal gobernu taldeak ñabardura batzuk egin nahi izan zituen.
Prentsa ohar baten bitartez xehetasun gehiago eman dituzte. Esan dute hondakinen kudeaketaren defizitak kezkatzen dituela. «Zaborraren kudeaketaren kostua 1.120.000 eurotan zehaztu da 2019ko aurrekontuan; zaborren kudeaketagatik diru-sarrerak, hau da, tasak eta beste, 681.000 eurotan zehaztu dira. Ondorioz, aldea 440.000 eurokoa da», gogorarazi dute.
Alde hori handiegia dela iritzi dute, eta ahalik eta gehien murriztu behar dela. «Europako politikek berek aldarrikatzen dute, zaborra sortzen duenak berak ordaindu behar duela zaborraren kudeaketa eta tratamendua», gaineratu dute jeltzaleek.
Etxez etxekoa
Etxez etxeko zerbitzuaren tasa jaitsiko dela eta, nabarmendu dute aldundiarekin sinatutako hitzarmenari esker izango dela: “Gogorarazi nahi dugu EAJ-PNV dela Aldundiko gobernuan dagoen alderdi nagusia eta ahalegin berezia egiten ari dela gizarte zerbitzuak ahalik eta hoberenak izan ditzagun”.
Bestalde, Elorsoro kiroldegiaren egoerak ere kezkatzen ditu, plenoan azaldu zuten bezala.
Auzo batzarrak
Datorren astelehenean udalak antolatutako auzo batzarrak hasiko dira. EAJk dei egin die bere afiliatu eta jarraitzaileei horietara joan daitezen.
Joan ezin dutenei, berriz, iradokizunak helarazteko aukera izango dutela jakinarazi diete. Goizetan udalean egoten den Janire Mitxelena zinegotziaren bitartez, edo e-posta helbidera idatziz.
