Kuadrillategi Oiartzungo 180 gaztetxorekin hasiko da
Sei begirale ariko dira lanean, DBH1 eta DBH2 mailetako ikasleekin. Datorren astean hasiko da Kuadrillategi, Kataxulo Gaztetxian.
Iazko Kuadrillategi Egunaren irudia.
Gaur zortzi hasiko da Kuadrillategi, eta Oiartzungo zenbat gaztetxok parte hartuko duten jakinarazi dute. Ez dira gutxi izango: DBH 1. eta 2. mailetako 180 ikasle oiartzuarrek parte hartuko dute aurten.
Arduradun bezala eta dinamizatzaile lanetan, sei begirale ariko dira ikasturtean 180 gaztetxoekin: Uxue Flamarique, Lide Ibarguren, Itsaso Markos, Adur Oiartzabal, Ugaitz Susperregi eta Nerea Vallejo.
Lehenengo saioa urriaren 4an izango da, ostiralarekin. Kataxulo Gaztetxian hasiko dute ikasturtea, eta Mendiburu 14 eraikineko obrak hasten direnean, beste aterpe bat bilatuko dute.
Kuadrillategik aisialdian euskara ohiturak sustatzeko helburua du eta Oarsoaldeko lau herrietan egiten da. Iazko ikasturtea Kuadrillategi Egunarekin bukatu zuten, lau herrietako gaztetxoak elkartuz. Horretarako asko falta da oraindik. Bitartean, gozatzera… euskaraz.
