Oiartzuarrak prest daude 'Ein prosit' artean topa egiteko
Oiartzungo Garagardo Festaren 15. ekitaldia ospatuko dute hilaren 10etik 12ra. Opariak banatuko dituzte, baita Hitzaren bitartez ere.
Hemezortzi garagardo ezberdin proba daitezke.
Oiartzunek badu bere Oktoberfest propioa. Bavariako hiriburukoa bezala, garagardoan oinarritzen da festa: hemezortzi mota ezberdin dastatzeko aukera izango da hilaren 10etik 12ra (ostegunetik larunbatera). Beraz, Munichen topa egiteko erabiltzen den Ein prosit abesteko hiru egun dituzte oiartzuarrek. Hala ere, ez da alemana jakin behar fundamentuz topa egiteko.
Ostegunean, pintxo-prostarekin hasiko da garagardo festa, 19:00etan. Lehenengo egun horretan 00:00etan itxiko dute plazan prestatuko duten txokoa (ostiralean ordubete geroago itxiko dute).
Larunbatean, berriz, aurtengo berritasunetako bat iritsiko da: eguerdian bazkariak eskainiko dituzte. 12:00etatik 01:00etara egongo da irekita. Tartean, aurreko ekitaldietan bezala, haurrentzako puzgarriak jarriko dituzte 17:00etatik aurrera, eta txokolatea eskainiko diete salto egiterakoan galdutako kaloriak berreskura ditzaten.
Eta parranda eta kirola uztargarriak direla erakusteko, Urkabeko Igoeraren laugarren ekitaldia egingo dute. Izen ematea eta gainontzeko informazioa esteka honetan aurki daiteke.
Opariak
Festak irauten dituen hiru egunetan, 60 saritik gora zozkatuko dituzte, 22:00etatik 23:00etara bitartean. Ez da banatuko dituzten opari bakarrak izango.
HITZAren bitartez, pertsona batentzako bi menu zozkatuko da. Hilaren 11ko afaria edo hilaren 12ko bazkari edo afaria izan daiteke. Datorren asteko papereko edizioan —hilaren 11koan— jakinaraziko da irabazlea nor den. Parte hartzeko, sartu Hitzaren txokoan.
