Organoa eta tronboia, Jose Manuel Azkue omentzeko
Asteburuan egingo dute, seigarren aldiz, Azkue Memoriala. Adam Wolf eta Jose Luis Etxetxipia musikariek emango dute kontzertua.
Adam Woolf tronbonista gonbidatu dute.
Organo instrumentuak maite dituztenen artean prestigioa hartzen ari den urteroko zita hemen bertan da. Oiartzungo Organozaleek antolatuta, VI. Azkue Memoriala egingo dute datorren asteburuan.
Jose Manuel Azkue organo jotzaile hertsiki lotuta zegoen bi udalerrian egingo da, iaz bezala: sorterrian (Oiartzunen) eta urte luzez bizi izan hirian (Irunen).
Aurtengo ekitaldirako Jose Luis Etxetxipia organista gonbidatu dute. Eta urtero egiten duten bezala, organoaren musikari beste instrumentu bat (edo ahots, urte batzuen kasuan) erantsiko zaie: tronboiarena. Adam Woolfek joko du.
Lehenengo kontzertua Oiartzungo San Esteban parrokian izango da, larunbatean (hilak 5). Bi musikariek parte hartuko duten mahai inguruarekin hasiko da, 19:15ean. Hori bukatuta hasiko da kontzertua —20:00 aldera—.
Biharamunean formatua errepikatuko da, Irungo Junkaleko elizan. Ordubete lehenago egingo dituzte biak ala biak.
Jose Manuel Azkue
Jose Manuel Azkue 1927an jaio zen, Killirikupe gaineko Aginalgalde-Etxean. Sei urterekin eman zuen izena Donostiako Musika Kontserbatorioan. 11 urterekin Alesbesera (Nafarroa) joan zen fraide ikasketak egitera, eta urtebete beranduago hasi zen mezetan jotzen. Hainbat urtez komentuz komentu ibili zen, organista moduan.
Hogei urterekin apaiz izateko erabaki behar zuenean, atzera egin zuen. Irunen eta Donostian ibili zen organista moduan. 1954an AEBtara joan zen, eta bi hamarkada eman zituen bertan, organoa ogibide izaten.
1975ean Euskal Herrira bueltatu zen, Donostiako Koruko Andre Mariaren parrokian organista postua lortuta. Donostian eta mundu guztian zehar eman zituen kontzertuak. 2008an hil zen.
