35 urte uhinak astintzen
Uhinetan 35 urte bete ditu Zintzilik Irrati libreak. Ibilbide luzea bezain oparoa izan den zalantzarik ez da, eta urteak betetzeko asmoz jarraitzen dute, uhinak astintzen jarraitzeko gogoz.
Uhinetan 35 urte bete ditu Zintzilik Irrati libreak. Ibilbide luzea bezain oparoa izan den zalantzarik ez da, eta urteak betetzeko asmoz jarraitzen dute, uhinak astintzen jarraitzeko gogoz. Horretarako, denboraldi berrirako programazioa prestatzen hasiak dira eta norbanako zein eragileak deitu dituzte irratiarekin bat egitera, “saio bat eginez, momentu zehatz bateko irrati lanak eginez, bai irratiari laguntzeko lan ezberdinak eginez”.
Datorren asteazkenean, hilaren 9an, egin dute hitzordua perrategian, irratiaren egoitzan 19:00etan. Prest dira egun horretan jendearen proposamenak, kezkak, zalantzak edo dena delakoak jasotzera. Zintzilik, irrati librea gogorarazi dute, “autogestioan eta batzarrean oinarritzen gara eta saio eta eduki kritiko eta ez komertzialak lantzen ditugu. Irizpide horiekin bat egiten baduzu ateak zabalik dituzu”.
Interesa izan baina bilerara bertaratu ezin dutenentzat beste bide bat ere martxan du irratiak: “Bidali posta elektronikora mezua edo bilatu sare sozialetan gurekin harremanetan jartzeko bidea”.