[Bideoa] Irmotasuna eta ardura eskatu ditu Duintasunak
Indartsu itzuli da oporraldiaren ostean Duintasuna, eta errebindikazioa inoiz baino biziago mantentzeko asmoarekin pentsio eta bizitza duina bermatzen ez dieten artean, bederen.
Duintasunaren manifestazioa. Indartsu itzuli da oporraldiaren ostean Duintasuna, eta errebindikazioa inoiz baino biziago mantentzeko asmoarekin pentsio eta bizitza duina bermatzen ez dieten artean, bederen. Espainiako Estatuko egoera politikoari erreparatu diote, eta kezka azaldu “gobernu berria eratzeko moduak ikustean”, baita hauteskunde berriek izan ditzaketen ondorioengatik pentsio publikoen etorkizunerako.
Milaka eta milaka pentsiodunen egoerarekin kezkatuta azaldu da, gehienetan emakumeak, “hilabete amaierara heltzeko zailtasunak baitituzte, ez dutelako argindarraren faktura ordaindu, ezta gasa edo behar dituzten sendagai guztiak ere”. Larrialdi egoeran direla salatu du elkarteak eta exijentzia zehatzak egin: Gizarte segurantzaren finantziazioa eta pentsio publikoaren sistemaren etorkizuna bermatuko duen legedia; urteroko KPIaren igoera automatikoaren legezko bermea; 1.080 euroko gutxieneko pentsioa bizitza duina bermatzeko; pentsio erreformen indargabetzea eta batez ere jasangarritasun faktorea, eta gizon eta emakumeen arteko soldata aldearekin amaitzea.
Pentsioez arduratzen da jubilatuen mugimendua, baina ez horretaz bakarrik ordea, eta argi utzi dute gaur, “lan baldintzez eta soldatez ere arduratzen gara, baita negoziazio kolektiboez ere. Lanbide arteko gutxieneko soldata duina defendatzen dugu, prekarietate izugarriarekin amaitu behar duen enplegu eta soldata duinak, horiek bermatuko baitute, finean, gizarte segurantzan kotizazio eta diru sarreretan hobekuntza”.
Programa progresista defendatzen duten indar politiko guztien akordioa abian jartzea galdegin du Duintasunak, “ezinbestekoa da Espainiako Estatua gobernatzeko, pentsioen sistema publikoak dituen beharrak konponduko dituen legeak abian jartzea, pentsiodunek, langileek, langabeek eta gizarte beste arlo batzuetan bizi duten ziurtasun ezarekin amaitzea”.
Arduraz jokatzeko eskatu die Duintasunak indar politikoei: “Milioika pentsiodunen aldarrikapenak entzun eta hauen arazoak konpontzea eskatzen diegu. Ez dago arrazoi politiko bakarra jendea alde batera, bazterrean uzteko, eta arrazoi ugari, ordea, agintari ekonomiko eta finantzario isilarazteko”.
Kaletan eta plazetan borrokatzeko konpromisoa berretsi dute gaur bildutakoek, “momentuak eskatzen duelako eta horrela defenditzen ditugulako gure aldarrikapenak”.
