Katerin Artola dantzariaren sariak udaletxean hartu du ostatu
Soinu Zahar eta Aurresku Txapelketa irabazi zuen Ordizian, eta Patxi Epelde eskultoreak egindako oroigarria udalari utzi dio.
Katerin Artola dantzariari harrera egin diote gaur arratsaldean, udaletxean. Soinu Zahar eta Aurresku txapelketan gailentzea lortu zuen irailaren erdialdean, Ordiziako Euskal Jaietan.
Artolak Cousillasi laga dio eskultura, udaletxean gorde dezaten.
Bigarren aldiz ospatu zen mutil eta neskek parte hartzen duten txapelketan. Eta Katerin Artolak bigarren aldiz lortu du txapelketa. Beraz, bitik bi dantzari oiartzuarrarentzat.
Txapelketaren antolatzaileek —Amets Bide eta Gipuzkoako Dantzarien Biltzarrak— eman diote Patxi Epelde eskultoreak egindako oroigarria, eta Iosune Cousillas Kultura zinegotziak Artola zoriontzeko hitzak izan ditu, udalaren izenean: “Ohore bat da guretzat Euskal Herrian horrelako txapelketa bat antolatu eta neska batek irabaztea, eta gainera oiartzuarra izatea. Gainera, aurten bigarren aldiz. Mutilak aurretik joan dira mundu horretan, eta bada garaia neskek aurrea hartzeko”.
Artolak esan duenez, txapelketa garaian ia egunero entrenatzen omen da, eta erritmoa jaisten du urteko beste sasoietan. Dantzarekin lotura estua du Artolak: txapelak janzteaz gain, irakasle eta epaile lanetan ere aritzen da.
Datorren urtean txapelketa berriro irabaziko balu, oroigarria beretzako izango litzateke. Kultura zinegotziak dantzatzen jarrai dezan animatu du, ariketa fisikoa egiten delako eta euskal kultura sustatzen delako.
Egindako harreran, Ametsbide eta Gipuzkoako Dantzarien Biltzarreko ordezkariak egoteaz gain, Artolaren senideak ere bai izan dira. Ordiziako Udaleko ordezkariek ezin izan dute hurbildu.
