Udalak lehen ibilgailu elektrikoa eskuratu du
Eraginkortasun energetikoan beste urrats bat dela adierazi dute udaleko arduradunek. Elektrikariek erabiliko dute ibilgailu berria.
Lekuona, Arbelaitz eta Etxebeste, auto berriarekin.
Oiartzungo Udalak bere lehenengo lanerako ibilgailu elektrikoa eskuratu du, eta elektrikariek erabiliko dute laneko joan-etorrietarako. Gaetxeko udal biltegietan prestatu dute autoaren bateria kargatzeko azpiegitura.
Eneritz Arbelaitz Ingurumen eta mugikortasun zinegotziak, Agustin Lekuona Hirigintza zinegotziak eta Oier Etxebeste udaletxeko elektrikari taldearen arduradunak aurkeztu dute gaur eguerdian.
Urrats bat gehiago
Zinegotziek azaldu dutenez, energia eraginkortasunaren bidean emandako beste pauso bat da ibilgailu elektrikoa erostearena.
Orain arte egindakoei errepasoa eman diete: udal eraikinetako eraginkortasun energetikoa hobetzeko argiztapen eta berogailu sistemak egokitu dituzte; kaleko argiteria sisteman hobekuntzak; Elizalde Herri Eskolan energia aurrezteko proiektua martxan jarri dituzte…
Datorren urtarrilaren 1etik aurrera udal erakundeek erosiko dituzten ibilgailu berriak elektrikoak izango dira, Eusko Jaurlaritzak martxoan onartu zuenez. Oiartzungo Udala hasi da horretarako urratsak ematen.
