Oiartzungo antzerki egitaraua prest dute
Oiartzungo Antzerkizaleek ikasturte honetako egitaraua jakinarazi dute. Hilaren 20an hasiko dira, Atx Teatroaren '7ak bat' lanarekin.
‘7ak bat’ obra izango da antzerkizaleen lehen mokadua.
Oiartzungo Antzerkizaleak oihaltzarra irekitzeko prest dira berriro. 2019/2020 ikasturtean herrian ikus ahal izango diren obren berri eman dute.
Hilabete honetan bertan hasi eta maiatzera arte, zortzi obra taularatuko dituzte udaletxeko pleno aretoan, 19:00etan hasita (behean zehaztutakoak izan ezik). Hilero-hilero, Oiartzunek antzerkiarekin duen zitak ez du hutsik egingo.
Lehenengo saioa hurrengo igandean —hilak 20— izango da, Atx Teatroaren 7ak bat lanarekin. Antzezlan hori gaizkia nondik datorren bilatzen saiatzen da, euskal kulturako —eta, oro har— zazpi bekatu nagusiak oinarri hartuta.
Ikasturtea bukatzeko, herriko taldeek berriki lantzen hasi direna oholtzara eramango dute. Txinalkak bere saio bikoitz klasikoa eskainiko du maiatzaren bukaeran, eta ekainean gazte taldeen txanda izango da.
Egitaraua
- Urriak 20: 7ak bat (Atx Teatroa).
- Azaroak 17: Panpina (Erika Olaizola eta Kamikaz kolektiboa).
- Abenduak 28: Lur (Xake produkzioak; haurrentzako lana, 18:00etan hasiko da).
- Urtarrilak 12: Ortentsia izan nahi dut (Abarka).
- Otsailak 9: Manifestu bat (Beheko Larraine).
- Martxoak 15: Tomiris (Atx Teatroa).
- Apirilak 19: Anton Abbadia: Dublinetik Hendaiara (Txomin Heguy, Mixel Ducau, Xabi Zeberio eta Alaia Phillips-Ducau).
- Maiatzak 10: Kaffka (Kamikaz kolektiboa & Gehitu).
- Maiatzak 23 eta 24: Txinalka antzerki taldearen urteroko bi emanaldiek (20:00etan eta 19:00etan, hurrenez hurren).
- Ekainean: Oiartzungo antzerki ikasle gazteen emanaldiak.
