Hondakinen eta ur eta estolderiaren tasetan salbuespenak proposatu ditu EAJk
Alderdi jeltzalearen esanetan, krisi ekonomikoa gehien pairatzen dutenen hobariei, ingurumenaren zaintza sustatzen dutenei eta etxebizitza hutsak mobilizatzeko helburua dutenei eusten diete beren proposamenean.
Bosgarren edukiontzia aktiboki erabilzten dutenei hobaria %5 igotzea proposatu du alderdi jeltzaleak. Gobernu taldeak 2020ari begira aurkeztutako ordenantza fiskalen aurrean hainbat proposamen aurkeztu dituela jakinarazi du EAJk prentsa ohar bidez. Alderdi jeltzalearen esanetan, krisi ekonomikoa gehien pairatzen dutenen hobariei, ingurumenaren zaintza sustatzen dutenei eta etxebizitza hutsak mobilizatzeko helburua dutenei eusten diete. Aurkeztutako proposamenak “zentzuzkoak” eta “egingarriak” direla esanda, azaldu egin dituzte: “Gobernu taldeak aurkeztutako proposamenean KPIaren araberako igoera proposatzen da, %0,6koa hain zuzen ere, baina hondakinen bilketa tasa %2 eta ur hornidura eta estolderiarena %2,5 igotzea aurreikusten da. Azken bi tasa horien igoerari aurre egiteko salbuespenak proposatu ditugu errenta baxuenentzat”.
Bi tasa horietan, bizikidetza unitatearen diru sarreren araberako salbuespenak proposatu ditu. Ibilgailuen gaineko zergan ere, foru arauak aurreikusten duen familia ugarientzako %50eko hobaria aplikatzea eskatu du, hori ere kideen eta diru sarreren arabera. Hondakinen zergaren kasuan, bosgarren edukiontziaren programan aktiboki parte hartzen dutenentzat hobaria %25etik %30era igotzea ere proposatu dute, “edukiontzi horren erabilera areagotzeko”.
Horietaz gain, zenbait hobari proposatu ditu EAJk ingurumenaren zaintzarekin, edota etxebizitza hutsak mobilizatzearekin lotuta. Ingurumenaren zaintzarekin lotuta, ibilgailu hibridoei %75eko hobaria eta elektrikoei %95ekoa 5 urtez aplikatzea proposatu dute jeltzaleek. Etxebizitza hutsak alokairu sozialera mobilizatzeko, Bizigune programaren barruan edo antzekoak diren beste foru edo udal programen barruan dauden etxeen OHZ Ondare Higiezinen Zergan %50eko hobaria proposatzen dute: “Errenteriako Udalak aurten, urte luzez, gure udal taldeak eskatu bezala, Alokabiderekin etxebizitza hutsak mobilizatzeko lankidetza hitzarmena sinatu badu ere, ez baitu gobernu taldeak ordenantza fiskaletan horrelako neurririk jaso”.
EIT Eraikinen Inspekzio Teknikoak agintzen dituen irisgarritasuna, bizigarritasuna edota energia eraginkortasuna hobetzeko obren gaineko zergan %95eko hobaria proposatu dute, bestalde, eta %75ekoa Alde Zaharrean fatxadak berritzeko obretan.
