Dibertsitate funtzionalaren 'betaurrekoak' jartzera deitu du Atzegik
Atzo aurkeztu zuen Atzegik 'Bizi nire errealitate intelektuala eta mugak hautsi' kanpaina Trintxerpen, dibertsitate funtzionala duten pertsonen egunerokoa ulertarazteko.
Trintxerpeko Serafin Esnaola plazan egin zuten kanpainaren aurkezpena atzo. Nire errealitate intelektuala bizi eta mugak hautsi lelopean, irisgarritasun kognitiboan sakontzeko kanpaina egin du Atzegi elkarteak. Atzo arratsaldean bilkura txikia egin zuten Trintxerpeko Serafin Esnaola plazan eta gaur bertan emango diote amaiera kanpainari, Gipuzkoa osoan. Dena dela, antolatzaileek argi utzi dute, kanpainaz harago sentsibilizazio lana etengabekoa dela. Pasaiako Udaleko zinegotzi Loreto Osa, Mari Carmen Castro Oarsoaldeko Atzegiko ordezkaria eta Susana Velasco Atzegiko Elkartekintza eta Familia Laguntza Zerbitzuko arduradunak hartu zuten hitza agerraldian.
Dibertsitate funtzionala dutenei mundua ulergarriagoa egitea da Atzegiren helburuetako bat. Horregatik haien larruan jartzea izan du helburu kanpainak, gizartean eta egunerokoan bizi dituzten zailtasunak lehen eskutik sentitu, eta ulertzeko. Enpatia ariketa izan da funtsean.
Dibertsitate funtzionalaren betaurrekoak jarriz, irisgarritasun kognitiboaren inguruko, hausnarketa bultzatu du elkarteak, zailtasunak dituztenei, modurik errazenean azaltzeko. Frogatuta baitago, inguruan gertatutakoa ulertzen dutenek, autonomia gehiago garatzen dutela.
Esan bezala, kanpaina bukatu arren, egunerokoan sentsibilizatzen jarraituko dute Atzegiko kideek. Helburu horri jarraiki, hainbat baliabide prestatu ditu elkarteak; kartelak egin dituzte, liburuxka bat argitaratu dute eta webgune bat sortu dute.
