Udal gobernua geldituta dagoela dio Pasaiako EH Bilduk
Legealdiaren lehen 100 egunak igarota udal gobernuak ezer gutxi egin duela dio Pasaiako EH Bilduk. Herriak dituen erronkei aurre egitea eskatu dute.
EH Bilduk kargu hartu dio udal gobernuari legealdiko lehen 100 egunak igaron direnean. Pasa dira legealdiaren ‘kortesiazko’ lehen 100 egunak, eta Pasaiako EH Bilduk dagoeneko kargua hartu dio Izaskun Gomezek zuzentzen duen gobernuari. “Ardurak banatzetik harago” PSE-EEk eta EAJk osatutako gobernuak ez duela ezer gutxi egin nabarmendu du koalizio abertzaleak. Gainera, herritarrekiko arreta orduan murriztu dituztela ere salatu dute.
Azken hauteskundeetan indar politiko bozkatuena, EH Bildu izanda, herriko betebeharrei ekiteko ardura bere gain hartu dutela azaldu dute. “Pasaiak dituen erronkei aurre egiteko eta elkarlanean aritzeko prestutasuna”, agertu du beste behin oposizioko taldeak.
Pasaian etenda edo utzita dauden gaiei heltzeko eskatu diote udal gobernuari. Zaharren egoitzari, uren saneamenduari edota San Pedroko lonjari behin betiko konponbidea ematea nahi dute. Hauteskundeak irabazi zituen alderdiari, gobernua “kendu” ondoren, behintzat udal gobernu plan serio bat aurkezteko eskatu du Pasaiako EH Bilduk.
