Urriaren 15ean mobilizatzera deitu dute erresidentzietako langileek
ELA sindikatuak antolatuta, 'Gipuzkoan Zehar" iniziatibaren barruko ibilaldia 11:00tan abiatuko da, Sanmarkosenetik. 115 egun baino gehiago eman dituzte greban langileek.
Sanmorkesenetik hasita, ibilaldia egingo dute langile grebalariek hilaren 15ean 115 egun baino gehiagoko borroka ikusgai jarriko dute Oarsoaldeko adineko egoitzen langileek hurrengo asteartean, 115 egun baino gehiago borrokan, lan baldintza duinak eskatzeko, eta ondorioz Gipuzkoako milaka langileri arreta hobeagoa emateko.
Mobilizaziora deitu du gaur ELA sindikatuak, hilaren 15ean 11:00tan. Sanmarkosene adinekoen egoitzan hasiko dute eta udaletxearen albotik pasa ondoren, Fanderiara joko dute. Han bukatuko dute ibilaldia. Langile grebalariena, lan gatazka hutsaz harago doala argi utzi du, Feli Velazquez, ELAk Sanmorkesenen duen ordezkariak “gure borroka zerbitzuaren kalitatea eta gure aiton amonen bizi baldintzak hobetzearen aldekoa da. Gizartean zuzeneko eragina dauka”.
Protesta kolektibo baten parte izango da Errenterian-Oreretan egingo dena. Gipuzkoan zehar ekimenaren baitan hainbat mobilizazio egin dituzte Gipuzkoan. Hilaren 7an egin zuten lehen martxa, Donostian eta ordutik zenbait eskualdetan ere mobilizatu dira. Asteartean, Oarsoaldearen txanda izango da eta azken martxa hilaren 18an egingo dute.
115 egun baino gehiago eman dituzte greban adinekoen egoitzetako langileek.
Langileek, adinekoen egoitzetan dekretatu dituzten gutxieneko zerbitzuak salatu dituzte, neurrigabekoak direlakoan. %80ko gutxieneko zerbitzuak ezarri dituztenez, praktikan, langile askori grebara joateko aukera ukatu dietela nabarmendu du ELAk.
Gipuzkoako Foru Aldundiari iruzurretan aritzea egotzi diote, ez baitu serio negoziatzeko asmorik. Haien benetako helburua, adinekoen egoitzen pribatizazioa dela dio Iñaki Artetxe Oarsoaldeko Gizalan taldearen Ordezkariak, “foru aldundiak negozioa egin nahi du gure aiton amonekin eta ezin dugu ahaztu milaka gipuzkoarrengan eragin zuzena duela sektore honek”.
Uztailaren 31ean Eusko Jaurlaritzak onartutako dekretua gogora ekarri dute ELAko kideek, ratioak hobetu beharrean okertu zituztelako. Dekretu honek egoiliarren kalterako izango dela diote, langileek erabiltzaile bakoitzari eskainitako denbora, murritzagoa izango da eta.
