Babestutako hegazti bat zauritu dute ehiza garaiko lehen asteburuan
Belatz txiki bat topatu zuten atzo zaurituta Jaizkibelen, eta tiroz bota zutela berretsi zuten Arrano Etxean. Mehatxatutako Espezieen Euskal Katalogoak babestutako hegaztia da.
Hau ez da Jaizkibelen zauritutako belatz txikia, artxiboa irudia da. Argazkia: Jesus Mari Lekuona. Ehiza garaiaren lehen asteburua igaro da, eta dagoeneko zauritu dute babestutako hegazti bat. Belatz txiki bat (Falco Columbarius) tiroz bota dutela salatu du Eguzki Talde Ekologistak. Jaizkibelen ibilaldia egiten ari zen pertsona batek topatu zuen txoria, hegalean zauri bat zuela. Igeldoko Arrano Etxera eraman eta bertan baieztatu zuten, tiroz egindako zauria zela.
Zerrenda luze baten lehen biktima baino ez da izango Eguzki Talde Ekologistaren ustetan, argi baitute horrelakoak gehiagotan emango direla. Nabarmendu dute gainera, legez babestutako hegaztien kontrako eraso gehienak ez direla ezagutzen. Mehatxatutako Espezieen Euskal Katalogoak, animali bakan gisa sailkatzen du belatz txikia.
Nahiz eta jakin oso gutxitan identifikatzen direla erantzuleak eta ondorioz, salaketak artxibatzen direla, salaketa jarriko du Eguzki Taldeak, “delituak egiten direla bistaratzeko”. Babestutako hegazti bat botatzea legez kanpokoa da eta delitua izan daitekeela oroitarazi du Eguzkik.
Gertatukoaren ardura, Gipuzkoako Foru Aldundiari leporatu diote neurri batean. Eguzki taldearen arabera, egungo ehiza politika publikoak “babestutako hegaztiak botatzeko aukera handiak” ematen ditu. Aldundiarentzat, ehiztarien pisu politikoa, bioaniztasunaren babesa baino garrantzitsuagoa dela diote ekologistek.
