Bertakoak eta osasungarriak
Landalur Azokaren hamabosgarren ekinaldia egingo dute larunbatean egun osoz gamon zumardian.
Ferradas eta Zendoia gaurko agerraldian. Landalur Azokaren hamabosgarren ekinaldia aurkeztu dute gaur Jose Manuel Ferradas Ingurumen zinegotziak eta Mikel Zendoia Behemendi elkarteko teknikariak. Elikaduraren Nazioarteko Egunarekin bat eginda egin dutela aurkezpena nabarmendu du Ferradasek: “Elikadura osasungarria gosetu eta egarritutako mundu batentzat leloa jarri diote egun horri eta erabat egiten du bat gure Landalur azokarekin; izan ere, bertako ekoizleek sortutako eta landutako produktuak ditugu, osasungarriak, bertan bilduko dituztenak”.
Egun osoz izango da zabalik Gamon Zumardian, 10:00etatik 14:00etara eta 16:30etik 19:30era. Helbururik behinena, lehen sektorean ari diren ekoizleak argitara ateratzea, eta egiten duten lanaren aitortza egitea. Zendoiak nabarmendu du elikadura sortzaile direla, baina baita ingurumen zaintzaileak ere ekoizle horiek, “lehen sektoreko ekoizle hauek dira gure ingurua eta paisaia mantentzen dutenak, merkatua eta gertuko salmenta lekuak kalitatezko elikagaiez hornitzen dituztenak”.
Egun osoan zehar bertako produktuen azoka izango da eta bertan Eguzki Borda baserriko Idiazabal jatorrizko Izendapena duen gazta, Aparola baserriko behi gazta, bi baserri horietako barazkiak eta Zituene Pasta Obradore kooperatiboko pasta freskoa izango dira salgai. Abere eta perretxiko erakusketa ere izango da, baita erlezaintza ere eztien dastaketarekin.
Hitzordura ez dute hutsik egingo talogileek. Goizean gainera eta Egiluze sagardotegiaren eskutik sagardo naturala nola egiten den ikusteko aukera izango da eta 11:00etatik 14:00etara hiru tailer ere antolatu dituzte: haurrentzako landaketa eta lore prentsatu tailerra; helduentzako haziak lortzeko tailerra, eta familiei begirako haziak lortzeko tailerra.
Arratsaldean 17:00etan zabalduko ditu berriz ere ateak azokak. Haziak lortzeko tailerra eta Totebag pertsonalizatutako oihalezko poltsak sortzeko tailerra ere egingo dute. Eguna amaitzeko berriz, Basasoro baserriko esnearekin egindako txokolatea banatuko dute txikienen artean. Azokan, Labore Oarso, Gipuzkoako Erlezainak, Izadi21, artelatz eta Aitzbitarteko Lagunak elkarteek hartuko dute parte.
Zendoiak eman dituen datuen arabera, hogei ekoizle daude egun Errenteria-Oreretan, “ez dira asko baina askotariko produktuakl ditugu bertan”. Horren harira azoka egunean bertan eguneko erosketak bertako postuetan egitera animatu ditu herritarrak, baita urteko gainontzeko egunetan ere, “gertukoak, kalitatezkoak eta osasungarriak direlako”.
Ferradasek hurbiltzera deitu ditu herritarrak, ezagutzera ekoizleak eta produktuak eta erostera ere.
Egitaraua
- 10:00-14:00: Txalapartarekin deialdia eta baserriko produktuen salmenta eta abere erakusketa.
- 10:30-13:30: Sagardoa egiteko prozesua ikusi ahalko da Egiluze sagardotegiaren eskutik. Xenpelar bertso Eskolako bertsolariek prozesuaren gaineko bertsoak botako dituzte.
- 11:00: Errenteria-Oreretako Barin baserriko Lumagorri oilaskoaren haragia, taloak, Egiluzeko sagardoa, eta Eguzki Borda baserriko Idiazabal jatorriko izendapena duen gaztaren dastaketa.
- 11:00-13:00: Haurrentzako landaketa eta lore prentsatu tailerra.
- 11:00-12:00: Helduentzako haziak lortzeko tailerra.
- 16:30-19:30: Baserriko produktuen salmenta.
- 17:00-18:00: Familientzako haziak ereiteko tailerra.
- 17:30- 18:30: Haurrentzako Totebag pertsonalizatu tailerra.
- 18:00: Haurrentzako txokolate jatea.
- Egunean zehar Errenteriako dultzainero, txalapartari, trikitilari eta txistulariak, perretxiko erakusketa eta erlezaintza eta liztor erakusketa.
