Ez dute amore emango
Jubilatuen martxak Madrila iritsi direla eta, kalera atera da gaur Duintasuna Errenteria-Oreretan.
Kalera atera dira pentsiodunak, gaur ere. Jubilatuen martxak heldu dira Madrila. Atzo iritsi ziren eta gaur berriz manifestazioa egin dute milaka eta milaka pentsiodunek Espainiako Kongresuraino. Bertan, jubilatuen mugimenduaren aldarrikapenak biltzen dituen dokumentu bat erregistratu dute. Horren harira, kalera atera dira Duintasuna elkarteak deituta jubilatu eta pentsiodunak Errenteria-Oreretan, eta elkarretaratze laburra egin dute.
Madrila joandako bertako pentsiodun batekin hitz egiteko aukera izan dute. Madrilen milaka eta milaka lagun bildu direla jakinarazi du eta aldarrikapenez zeudela beteak kaleak, “gobernatzen duenak gobernatzen duela pentsioak defendatu behar direla esaten ari gara hemen bildu garenak. Giro paregabea, izugarria”. oihu batekin amaitu du: “pentsionistak aurrera” eta Errenteria-Oreretako Herriko Plazan 500 kilometrora zituen jubilatuek txalo zaparradarekin erantzun dute.
Duintasunak beste behin ere nabarmendu du pentsioena ez dela soilik egungo jubilatuen arazoa, “datozen belaunaldiei eragingo die, gaur egungo langileek ondorioak pairatuko dituzte”. Horren harira, elkarlanera deitu ditu jubilatuak noski, baina baita langileak ere, gazteak, emakumeak, “guztion etorkizuna dagoelako jokoan”. Horren harira, Duintasuna elkartea talde feministekin, ikasleekin eta beste sektoreekin biltzen ari dela jakinarazi dute gaurko agerraldian.
Datuak ere eman dituzte. Egun Euskal Herriko pentsiodun batek azken soldataren %78a jasotzen du, “10-15 urte barru, irabazitakoaren %45 edo %50ekoa izango da pentsioa. Prekarietate egoera honetan, egun langile batek 1.000 euro jasotzen baditu, pentsioa miseria bat izango du. Horren kontziente egin behar ditugu gure seme-alabak, baita gure bilobak ere; langileen eta kapitalaren arteko arazoa da, eta hilero kalera ateratzea ezinbestekoa da pentsio duinak bermatzea eskatzeko”.
Kalean jarraituko dutela eta bazter guztietara heldu behar dela pentsio duinen aldeko mezua eta borroka esan dute amaitzeko, eta argi dute, ez daude amore emateko prest.
