Ezkaratzetako oharrak, euskaraz
Euskararen presentzia handitzeko bidean, etxe atari edo ezkaratzeetan ohikoak diren oharrak eskuratzeko aukera dute herritarrek eta komunitateek.
Honakoak dira eskuragarri dauden bost errotuluak. Euren ezkaratzetan edo etxe atarietan jartzeko euskarazko errotuluak nahi dituztenek, horiek doan hartu eta dagokion tokian jartzeko aukera dute Oarsoaldeko lau herrietan. Hala, Oarsoaldeko Euskara Zerbitzuak —Oarsoaldeko lau udalek bultzatutako zerbitzua da— bost errotulu jarri ditu herritarren eta etxe komunitateen zerbitzura, har ditzaten. Honako mezuak dituzte horiek:
- Ez sartu, jabetza pribatua.
- Hemen utzi publizitatea.
- Komunitate honek ez du publizitaterik onartzen.
- Itxi atea, mesedez.
- Ez erre.
Izan ere, Oarsoaldeko Euskara Zerbitzua, euskararen presentzia handitzeko asmoz, zerbitzu bulegoekin ari da lanean aurten, hau da, aholkularitzekin, aseguru bulegoekin, finka administratzaileekin, edo higiezinen bulegoekin, Paper kontuak euskaraz nahiago kanpaiaren bidez. Beraz, oharrak jaso nahi dituztenek, hiru aukera dituzte horiek eskuratzeko:
- Egitasmoan parte hartzen ari diren finka administratzaile bulegoetan.
- Herri bakoitzeko euskara zerbitzuan.
- Herrietako udal arreta bulegoetan.
22 urte dira Oarsoaldeko Euskara Zerbitzua urtez urte alor jakin bateko establezimenduekin elkarlanean ari dela euskararen presentzia handitzeko asmoz. Esan bezala, 2019an zerbitzu bulegoekin batera ari dira kanpaina egiten.
