Lezo, itsaspean
Lezo Nazioarteko Itsaspeko Zinema Zikloaren portu izango da larunbat honetan eta hurrengoan. Ostiraletan, haurrentzako emanaldiak izango dira.
'Hondar 2050' lanaren fotograma bat. 26an emango dute. Hilaren 19an eta 26an, Nazioarteko Itsaspeko Zinema Zikloa jasoko du Lezok, Cimasub izenburupean. Saio bana eskainiko dituzte bi larunbat horietan publiko zabalari eskainiak. 18an eta 25an, baina, ikastetxeei eskainitako beste bi saio izango dira. Hortaz, Lezoko Nazioarteko Itsaspeko Zinema Zikloak lau emanaldi izango ditu. Denetan, munduko itsaspeko bizia eta bizimoduak ezagutzeko aukera izango da. Baina baita ere itsasoak bizi duen egoera lazgarriaren kontra borrokatzeko tresnen azalpenak jasotzekoa ere.
Larunbatetako emanaldiak, hau da, publiko orokorrari zabalik daudenak, 19:00etan izango dira Gezala Auditoriumean. Ostiraletakoak goizez dira, ikastetxeetako ikasleentzat direlako.
Nazioarteko zikloa da, eta besteak beste, Tailandia, Mexiko, Australia, Euskal Herria edo Indonesia daude lanen egileen jatorrian. Joan den astean Donostian egin zuten Cimasub, eta Lezoko emanaldiak, horren jarraipena izango dira. Real Sociedad taldeko urpekarien taldeak antolatzen du Cimasub, eta dokumental eta film laburrak Lezora ekartzeko udalaren ezinbesteko laguntza izan dute.
Jarraian, hilaren 19ko eta 26ko programazioa
Hilak 19, larunbata. 19:00etan Gezala Auditoriumean.
- Impermanencia (Tailandia, 5 minutu).
- Los secretos del ángel (Kanariak, 26 minutu).
- Euskal urdina (Euskal Herria, 4 minutu).
- Deep (Euskal Herria, 4 minutu).
- Pura Maro (Euskal Herria-Australia-Mexiko, 6 minutu).
- Scorpion Fish (Mexiko, 8 minutu).
Hilak 26, larunbata. 19:00etan, Gezala Auditoriumean.
- Ocean’s Shock (Euskal Herria-Kantabria, 4 minutu).
- Hondar 2050 (Euskal Herria, 45 minutu).
- Pisciforms (Maurizioko Errepublika, 11 minutu).
- Black & Blue (Indonesia-Itsaso Gorria-Alaska, 5 minutu).
- Truk Lagoon (Mikronesia, 3 minutu).
- Underwater Basque Country (Euskal Herria, 3 minutu).
