Mitikoak izan zirelako, aitortza
Los Xey talde mitikoari aitortza egingo diote, eta omenaldi horren erantzule Golden Apple Quartet eta EMKE Errenteriako Musika Banda izango dira
Collar, Rodriguez, Errondosoro eta Mitxelena. Los Xey talde mitikoari aitortza egingo diote, eta omenaldi horren erantzule Golden Apple Quartet eta EMKE Errenteriako Musika Banda izango dira. Gaur aurkeztu dute Golden Apple Xey ikuskizuna, Josu Mitxelena musika bandaren presidenteak, Carlos Rodriguez zuzendariak, Eduardo Errondosoro Golden apple Quartet taldeko kideak, Juan Luis Caballero talde horren managerrak eta Ion Collar Kultura zinegotziak.
Errenteriakoa, ikuskizunaren estreinaldia izango da eta azaroaren 22a ostiralarekin egingo dute 20:30ean Fatima Andra Mariaren elizan,. sarrerak dagoeneko salgai daude Niessen Kulturgunean 10:00etatik 13:00etara eta 17:00etatik 20:00etara. Prezioa 10 euro eta 7 euro elkarteko bazkideentzat.
Ikuskizunaren aurrestreinaldia Errenteria-Oreretan egietaren arrazoia Los Xey taldeak Errenteriarekin eta Errenteriako Musika Bandarekin izan zuten harreman estua izan da Mitxelenak azaldu duenez: “Los Xey taldearen sorreran eta bilakaeran garrantzia handia izan zuten Olaskoaga anaiek; Xabin Olaskoaga lehen tenore, urteetan partaide nagusi izan zen eta Xabier Olaskoaga taldearen sortzaileetako bat. Hori gutxi ez balitz, Xabin Olaskoaga gure musika bandako klarinetea izan genuen urteetan”.
Arrazoi horiengatik saiakera berezia egin zutela ikuskizuna Errenteria-Oreretan abia zedin aitortu du Mitxelenak.
1939-1940 urteen artean Donostian euskal abeslarie ta musikariez osatutako taldea abian jartzeko lehen urratsak egin zituzten. xabin Olaskoaga izan zen lehen tenorea, Xipri Larrañaga bigarren tenorea, Txiki Lahuerte baritonoa, Victor Gracia baxua eta Peito Iantzi eskusoinua. Bartzelonako Tivoli antzokian debutatu zuten Celia Gamezen eskutik. Euskal Herrian ezagun ziren, baina Espainiako Estatu osoan, Europan eta Mexikon ere egin ziuren ezagun, talde mitikoa bihurtzeraino.
Oholtza gainean aritu ziren, baina horrekin batera hamahiru filmetan ere azaldu ziren.
Ikuskizunari dagokionean, Los Xey taldearen hamasei abestirekin osatu dute errepertorioa, eta Xabier Zabala musikari zarauztarrak egin ditu moldaketak, eta kontzertuaren zuzendaritza artistikoa Carlos Rodriguez Albisturrek egingo du.
Errondosorok azaldu duenez, aukeratutako errepertorioa Golden Apple Quartetek bere ikuspegira moldatuko du. Ahotsa Loyola Garmendia, Mikel Urreizti, Manuel Romano eta Eduardo Errondosorok jarriko dute, baita umorea eta ironia ere. Los Xey taldea ziurrenik ahazturan gelditu direla egungo belaunaldientzat esan du Errondosorok, “baina oso garrantzitsuak izan ziren”. Ikuskizunarekin aitortza egin nahi diete, izan zuten paper garrantzitsua gogoratu eta haien izena eta ibilbidea oroitu.
Emanaldia ederra izango dela esan du Rodriguezek, “proiektu berria da eta erronka musika bandarentzat, baita harrotasun handia ere Goldenekin batera oholtza gainean aritzea ikuskizun honetan”.
Errealitate hori berreskuratzea eta transmisioa egitea “pozgarria” dela esan du bere aldetik Collarrek: “Batzuk gure aurrekoei entzunda ezagunak ditugu baita haien diskoak jaso ditugulako, baina ederra da berreskuratzea mitikoa izan zen talde baten ibilbidea; are gehiago Errenteriarekin lotuta daudelako”.
Fatima Andra Mariaren elizak hartuko du emanaldia, eta 750 leku direla bertan zain jakinarazi dute antolatzaileek. Emanaldi bikaina izango da Los Xey ezagutu eta entzun dituztenentzat, baina baita aukera hori izan ez zutenentzat ere.
