[Bideoa eta galeria] Herri txikia izanik, handiak dira lezoarrak
'Herri txiki infernu handi' saiorako bi grabazio egin dituzte Lezon, gaur bigarrena. Hamarnaka eta hamarnaka herritar gerturatu dira frontoira saioan ateratzeko asmoz.
Frontoia lepo zegoen grabaziorako. Ilara ikaragarria eragin du ETB1eko Herri txiki, infernu handi telesaileko saioaren bigarren grabazio egunak. Irekia zen gaurko saioa, baina mugatuak ziren lekuak, eta20:00etan zabaldu badituzte ere Bekoerrotako frontoiko ateak, bi ordu aurretik hasi da jendea lekua hartzen, saioaren grabazioa lehen eskutik jarraitzeko.
Zuhaitz Gurrutxaga eta Mikel Pagadi aurkezleek txalo zaparrada dezente lapurtu dizkiete lezoarrei, baita Sebastian Lizaso bertsolariak ere. Kopletan zer esan duen jakiteko, ordea, ETB1ek saioa eman arte itxaron beharko da.
Besteak beste, Mikel Susperregi, Enrike Arizaga, Juanito Elorza, Joakina Gaztelumendi edo Martxer Legorburu lezoarrak elkarrizketatu dituzte saiorako, eta kroketak ere azaldu dira hor nonbait. Norenak diren jakiteko ere saioa telebistan eman arte itxaron beharko dute, gaur frontoira hurbildu direnak dagoeneko jakinaren gainean badaude ere.
Herritarrei egindako grabazioa ere lehen eskutik ikusi dute gaur frontoira joan direnek, eta gogotik egin dute barre. Aurreko asteko elkarrizketekin eta gaur grabatzen ari diren saioarekin osatuko dute atala. Lezo herri txikia izango da baina handiak dira gero trapujaleak, eta hala erakutsi dute.
