EAJ: "Izan ditzaketen onurek, desadostasunek baino pisu handiagoa izan dute"
Onartutakoarekin ez dagoela erabat ados azalduta, herritarrentzat izan ditzakeen onurak kontuan hartu dituela babesteko garaian esan du alderdi jeltzaleak.
EAJko Maite Peña, Elixabete Murua, eta Garbiñe Oiarbide. Beraiek dira alderdi jeltzalearen ordezkariak udalean. Ordenantza fiskalak aho batez onartu zituen plenoak asteartean, oposizioko alderdiek aurkeztutako hainbat emendakin txertatzea onartu ostean. EAJk bere aldeko bozkaren azalpenak eman ditu prentsa ohar bidez. Onartutakoarekin ez dagoela erabat ados, baina herriarentzat ekar zitzakeen onurak desadostasunek baino pisu gehiago izan dutela erabakia hartzeko garaian esan du Elixabete Muruak.
Besteak beste, bosgarren edukiontziaren erabilera aktiboa egiten duten herritarrei hobaria %2 igotzea zegoen jokoan alderdiaren hitzetan eta haientzat “oso garrantzitsua” zela puntu hori zehaztu dute. “Birziklapena sustatzeko ekimenak beharrezkoak direla uste dugu, eta programa horretan parte hartzen ez dutenei tasa %2a igotzea egokia izan daiteke, baina garrantzitsua da, birziklatzen dutenei, gutxienez, tasa mantentzea eta ez igotzea”.
Alderdiak egindako beste ekarpen batzuk ere txertatu dituztela ordenantza fiskaletan zehaztu du Muruak: “Bizigune edo antzeko programetan dauden etxeen Ondasun Higiezinen Zergaren gaineko %50eko hobaria; ibilgailu hibridoei %75eko hobaria, eta elektrikoei %95ekoa 5 urtez aplikatzea, irisgarritasuna edota habitagarritasuna hobetzeko obrei %90eko hobaria”.
Guztiontzako berdinak diren tasetan progresibitaterantz pausuak emateko beharra ere ikusi dute jeltzaleek: “Hondakin bilketan eta uraren tasen kasuan, salbuespenak proposatu ditugu aurten ere diru sarrera murritzenak dituztenentzat”.
Jeltzaleek beren elkarlanerako borondatea berretsi dute, “era batera edo bestera gizarteari onurak ekartzeko helburuarekin egindako ekarpenak izan dira gureak. Hori da eta izango da gure lanaren oinarria udalean”.
