Kataluniaren alde egin dute alderdi guztiek, PSE-EEk izan ezik
Demokraziaren adierazpen baketsua, indibiduala zein kolektiboa gauzatzea eta herriari hitza ematea ez dela delitua diote adierazpen horretan, erreferenduma tresna demokratiko eta zilegizkoa dela, eta Kataluniak eta Euskal Herriak berezkoa dutela etorkizuna erabakitzeko eskubidea.
Errenteriako udaletxea. Elkarrekin Errenteria, EAJ eta EH Bilduk adierazpen bateratua egin dute gaur Kataluniako buruzagi independentisten aurkako epaiaren aurrean. Preso eta erbesteratutako politikoei, Kataluniako herriari eta erakundeei elkartasuna adierazi diete alderdi horiek. Demokraziaren adierazpen baketsua, indibiduala zein kolektiboa gauzatzea eta herriari hitza ematea ez dela delitua diote adierazpen horretan, erreferenduma tresna demokratiko eta zilegizkoa dela, eta Kataluniak eta Euskal Herriak berezkoa dutela etorkizuna erabakitzeko eskubidea.
Espainiako Auzitegi Gorenak Kataluniako agintariei eta gizarte eragileei bizkarreratutako auzia eta ezarritako zigorrak ezin dira justifikatu alderdi horien ustez, eta harago jo dute, auziak berak eta epaiak, Zuzenbide Estatuaren itxuragabetzea dakartela eta ezbaian jartzen dutela Espainiako Estatuko demokraziaren homologazioa nazioartean erantsi dute. Espainiako Estatuaren “erantzun bortitzak”, gainera, bete-betean eragiten diola Euskal Herriari diote, “herrien borondatea era demokratiko eta baketsuz erabakitzea mozten dutelako. Arazo politikoari tribunalen indarrez, 155. artikuluaren ezarpenez edo erabakitze eskubidearen alde egiten dutenei edonolako neurri bidegabeak ezarriz erantzuten dio”. Horren harira, irtenbide elkarrizketatu eta negoziatua bilatzea dela bidea esan dute, “eta herriari galdetzea”.
Espetxean diren preso politikoak berehala askatzeko galdegin diete Espainiako Estatuko botereei, baita erbesteratu politikoen aurkako auzibideak bertan behera utz ditzala, eta Katalunian elkarrizketa zintzo eta inklusiboa zabaltzeko ere eskatu diete, “lurralde krisiaren ondorio den gatazka politikoak irtenbide politiko eta demokratiko elkarrizketatu eta negoziatua izan dezan”.
Amaitzeko, elkartasuna adierazi diete hiru alderdiek Kataluniako preso eta erbesteratu politikoei nahiz haien etxekoei, baita Kataluniako herria eta erakundeei eta errenteriarrak deitu dituzte “herriari hitz ematearen, bakearen, demokraziaren eta askatasunaren alde” deituko dituzten ekintzetan parte hartzera.
