Podemos, EAJ eta EH Bilduk Kataluniari elkartasuna adieraziko diote, mozio bidez
Hurrengo udal batzarrean aurkeztuko dute hiru udal talde politikoek adostutako mozioa presoei, erbesteratu politikariei eta Kataluniako herri zein erakundeei babesa adierazteko.
EH Bildu, EAJ eta Podemosek babestuko dute mozioa. Espainiako Auzitegi Gorenak Kataluniako 9 buruzagi independentisten aurka ezarritako epaiak elkartasun olatu bat eragin du, baita Pasaiako Udalan ere. Pasaiako EH Bildu, EAJ eta Podemos Equo Berdeak udal taldeek preso, erbesteratu politikoei, kataluniar herriari eta erakundeei elkartasuna adierazteko mozioa iragarri dute. Hurrengo udal batzarrean aurkeztuko dute mozioa eta jarraian adieraziko diren puntuak jorratuko dituzte.
Pasaiako udalak ziurtatuko du demokraziaren adierazpen baketsua, indibiduala ala kolektiboa gauzatzea eta herriari hitza ematea ez dela delitua.
Espainiako Auzitegi Gorenak eta Estatuko botereek, Kataluniako agintari eta gizarte eragileei, bizkarreratutako auzia eta ezarritako zigorrak neurrigabeak direla adieraziko du Pasaiako Udalak.
Proces-aren aurka hartutako erabakiak Zuzenbide Estatua itxuragabetzen dutela, nabarmenduko du udalak.
Pasaiako udalak argi utziko du Espainiar Estatuaren jarrera bortitza zuzenean eragiten diela euskal herritarrei, herrien borondatea era demokratiko eta baketsuz erabakitzeko aukera moztu baita. Espainiar estatuak arazo politiko bati erantzun judiziala eman dio, neurrigabea gainera, elkarrizketa bide egin ordez. Gogora ekarriko dute gainera Espainiako justiziak 155. artikulua ezarri zuela, erabakitzeko eskubidea oztopatzeko.
Preso daude politikari eta ekintzaileak, berehala askatzeko eta erbestean daudenen kontrako auzibideak bertan behera utz ditzatela eskatuko du Pasaiako Udalak.
Pasaiako Udala, elkartasuna adieraziko die preso eta erbesteratu politikariei, zein haien etxekoei, baita Kataluniako herri eta erakundeei ere. Bukatzeko, Pasaiako herritarrei dei egingo diete bat egin dezaten herriari hitza ematearen aldeko ekimen baketsuekin, demokraziaren eta askatasunaren alde.
Salbuespenezko egoera honen aurrean, hiru alderdiek larunbatean Donostian egingo den mobilizaziora joateko deia luzatu diete herritarrei. Gure Esku-k antolatuta eta Erreferenduma ez da delitua lelopean Antiguatik abiatuko dira, 17:30ean.
