PSE-EE: "Lortutako akordioarekin pozik gaude"
OHZ Ondasun Higiezinen Zerga izoztea lortu dutelako babestu dituztela ordenantzak esan dute.
PSE-EEko Jose Angel Rodriguez, Isaac Palencia, eta Goizane Alvarez. Ordenantza fiskalen inguruan alderdi guztiek lortu duten akordioarekin “pozik” azaldu da PSE-EE. OHZ Ondasun Higiezinen Zerga izoztea lortu dutelako babestu dituztela ordenantzak esan dute, “horrekin batera euskararen tasa izoztea ere lortu dugu, ura eta estolderiaren tasa igoera txikiagoa izatea, hobariak hobetzea ibilgailu hibrido eta elektrikoentzat, landa eremurako hondakinentzat araudi berria, eta hondakinen txartelen kopiak ordaindu behar ez izatea”.
Alderdi sozialistak aurkeztu zituen emendakinekin presio fiskala arintzea zuela helburu esan du, “baina arriskuan jarri gabe diru bilketa eta inbertsiorako gaitasuna. Ez genuen nahi eragina izatea eskaintzen diren zerbitzuen kalitatean”.
Udalak soberakina izan duela azken bi urteetan esan du Jose angel Rodriguezek, alderdi sozialistaren bozeramaleak, eta foru funtsaren ez ohiko ekarpenak jasotzen, “gauzak horrela asumigarria iruditu zitzaigun KPIaren igoera ezartzea tasa eta zerga gehienei, baina ez beste batzuetan”.
