Sarrailagile bat deitu du, ustez lapurreta egin nahi zuen etxean sartzeko
28 urteko emakume bat atxilotu du Ertzaintzak bart gauean etxebizitza batean ustez lapurreta egiten saiatzen ari zela.
Ertzaintzak atxilotu egin du bide segurtasunaren aurkako delitua leporatuta. 28 urteko emakume bat atxilotu du Ertzaintzak bart gauean etxebizitza batean ustez lapurreta egiten saiatzen ari zela. Atxilotutako emakumeak sarrailagile baten zerbitzuak eskatu zituen etxebizitza horretan sartzeko, Segurtasun Sailak zehaztu duenez, bere “ustezko” etxeko giltzak galdu zituela esanda.
Ertzaintzaren patruila batek emakume eta gizon bat ikusi zituen atzo 23:15 inguruan etxabe batean kokatutako etxebizitza bateko sarraila manipulatzen. Gertatzen zena galdetzera hurbildu zirenean, etxebizitza horretan alokairuan bizi zela erantzun ziela jakinarazi du Segurtasun Sailak, eta giltzak galdu zituelako sarrailari bati deitu behar izan ziola atea zabaltzeko. Bertan zen gizona sarrailagilea zela baieztatu zuten ertzainek, baita deitu zutela ere. Ateko sarraila aldatua zuen jada.
Emakumearen jarrera susmagarria iruditu zitzaiela-eta etxebizitza horretan bizi zela erakusten zuen agiriren bat eskatu zioten atxilotuari, baina ez zuen agiririk aurkeztu. Etxebizitzaren jabearekin harremanetan jarri ziren orduan ertzainak; bidaian herritik kanpo zegoela, bakarrik bizi zela eta etxea ez ziola inori alokatu jakinarazi zien.
Emakumea, ustez indarra erabilita lapurreta egitea leporatuta atxilotu zuten ertzainek eta ertzain etxera eraman zuten, ondoren epaile aurrera eramateko.
