Elkartasuna eta sentsibilizazioa, indarkeria matxistari aurre egiteko
Elkarrekin biolentziei aurre eginez tailer praktikoa antolatu dute elkarlanean Sorburu Kooperatiba Feministak eta Haziak egitasmoak.
Azaroaren 6an eta 13an egingo dituzte tailerrak Oiartzunen. Elkarrekin biolentziei aurre eginez tailer praktikoa antolatu dute elkarlanean Sorburu Kooperatiba Feministak eta Haziak egitasmoak. Biolentziari biziraun dioten emakumeen arteko elkartasuna eta laguntza indartu eta herritarrak biolentzia matxistak emakumeengan duen eraginaz sentsibilizatzea da dinamikaren helburu nagusia. Emakumeei begirakoa da tailerra, norbanako, emakume elkarte, edota hezkuntzan ari direnentzat, eta bi saio egingo dituzte, azaroaren 6an lehena eta 13an bigarrena. Bi saioak Oiartzungo pleno aretoan izango dira, 17:00etatik 19:00etara.
Elkartasuna eta sentsibilizazioa landuko dute, baina hausnarketarako tartea ere izango da dinamika antolatzaileek nabarmendu dutenez: “·Belaunaldiz belaunaldi zerk zapaltzen gaituen eta horrek guregan nola eta non eragiten duen hausnartuko da. Gure gorputzean, komunitatean, etxeetan, heziketan, eskoletan… nola eragiten duen eta zer gertatzen den aztertuko dugu”. Horri aurre egiteko aldaketak nondik etor daitezken ikusiko dute gainera, eta aukera dagoenetan pausuak emateko bide egin.
Laborategi komunitario gisa, tailer esperimentala proposatu dute dinamikaren bidez oinarrian. Bertan, esperientziak partekatu, eta hausnarketarako eremua sortuko dute, “aurreiritziak zalantzak jarri eta elkartasuna eta babesa eskaintzeko”.
Tailerra elebitan izango da, eta doakoa, hala ere, aurretik izena eman behar da 645 005 496 telefono zenbakira mezua bidalita edo deituta.
