Arantxa Urretabizkaiaren 'Zergatik panpox', jarraian
Arantxa Urretabizkaiak duela 40 urte argitara eman zuen 'Zergatik panpox'. Emakume batek euskaraz idatzitako lehen eleberria izan zen.
Areantxa Urretabizkaiak 1979an idatzi zuen 'Zergatik panpox'. Arantxa Urretabizkaiaren Zergatik panpox liburuaren irakurketa jarraitua egingo dute azaroaren 24an, 10:30ean hasita, Oiartzunen. Txandakako irakurketa izango da, eta udaletxean egingo dute. Lehen aldia da Oiartzunen gisa honetako jarduera bat egiten dela. Aldez aurretik izena eman behar da irakurketan parte hartzeko.
Oiartzungo Irakurketa Taldeak eta Hitzen Lihoa egitasmoak elkarrekin antolatu dute irakurketa. Emakume batek euskaraz argitaratutako lehen eleberria izan zen Zergatik panpox, eta aurten, Hitzen Lihoaren protagonista emakume idazle eta sortzaileak direnez, irakurraldi kolektiboa horrekin egitea erabaki dute.
Izen ematea
Egitasmoaren bultzatzaileek jakinarazi dute beharrezko dutela aldez aurretik jakitea nor dagoen prest irakurketan parte hartzeko, antolaketa erraztearren, eta irakurle bakoitzari zehatz emateko aurretik zein zati irakurri behar duen.
Hala, izena emateko Hitzen Lihoaren posta elektronikora mezua bidali behar dute interesdunek. Bertan irakurketarako prest dagoenak izena esatearekin aski du. Azaroaren 10a arteko epea ezarri dute izen ematerako.
Behin izena emanda, liburua eskuratzeko aukera izango dute irakurketa egingo dutenek, Manuel Lekuona Bibliotekan eskaera orria beteta.
Bestalde, antolatzaileek jakinarazi dute parte hartzaileekin bazkaria egin nahiko luketela egun horretan Joxixionia jatetxean. Hortaz, bazkaltzeko asmoa dutenei posta elektronikoan hori zehaztea eskatu diete.
