XXVII. Mendiola-Ulia ibilaldi neurtua egingo dute igandean
Ibilaldia Trintxerpeko merkatuan hasiko da 8:00tan eta 2 eta 45 minutu beranduago bukatuko da, Serafin Esnaola plazan. 14:30ean herri bazkaria egingo dute.
Mendiola-Ulia ibilaldi neurtua antolatuko du Trintxer Mendi Taldeak igandean. Ibilaldi neurtua klasiko batean bihurtu da jada; aurtengoa 27. edizioa izango da. Mendi taldeko bazkideek 5 euro ordaindu beharko dituzte parte hartzeko, bazkide ez direnak ordea, 7 euro. Haurrentzako prezioa 4 eurokoa izango da.
8:00tan abiatuko dira Trintxerpeko azokatik. 18 minutu izango dituzte San Pedroko puntetara iristeko. Bertan hasiko dute igoera. Platako farolako errepidera iristean, GR-121 bidetik Herri Ametsa ikastolaraino ibiliko dira. Han topatuko dute parte hartzaileek lehen kontrola.
Fitxatu ondoren, bide beretik jarraituko dute eta Uliako Aterpetxetik hurbil, hustubidera jaisten den pistara iritsiko dira. Han topatuko dituzte bigarren eta hirugarren kontrolak. Uliara berriz ere igoko dira, eta Trintxerperantz itzuliko dira. Serafin Esnaola plazan bukatuko da Mendiola-Ulia ibilbidea. 14:30ean bazkaria egingo dute Trintxer elkartean. Bazkarirako ekarpena 20 eurokoa izango da.
Banaka ala taldeka —gehienez 3 lagun— parte hartu ahalko da. Parte hartzaile guztiek kontrol guneetan fitxatu beharko dute, egindako ibilbidea aintzat hartu dadin. Arduradunek jakinarazi dute proban gertatutako edozein istripuren ardura, ez dutela haien gain hartuko.
