35 urte geroago, oraindik ere beharrezkoa
Zintzilik irratiak 35 urteurren jaialdia antolatu du azaroaren 9rako. Hasieran bezain beharrezkoa dela irratia 35 urte geroago diote bertan parte hartzen dutenek.
Zintzilik Irrati Librearen parte diren kideak Perrategiaren kanpoaldean. argazkia: Zintzilik Irratia Hari batetik zintzilik 35 urte bete ditu Zintzilik Irrati Libreak. Perrategitik, bere egoitzatik, lau haizetara zabaldu du mezua urte luze horietan, ahotsik gabekoei eta programazio alternatiboei bide emanda. Urteurrena ospatzeko hainbat ekitaldi antolatu dituzte; lehenengoa azaroaren 9an (larunbata), antolatu duen urteurren jaialdia da. Ekitaldi horrek bi zati izango ditu, eta lehenengoa doan eta denentzat irekia bada ere, batez ere Zintzilik irratiko kide izan direnentzat eta irratia beariena sentitu duten guztientzat da. 20:00etan elkartuko dira Niessen eraikineko bigarren solairuko entsegu gelan eta ikasturteko programazio parrila aurkeztuko dute. Mokadutxoa, brindisa eta bildutakoen arteko familia argazkia egingo dute ondoren.
Jaialdiaren bigarren zatia musikaz jantzi dute. 21:30ean hasita, DJ Selektha Stepi, Nizuri Tazuneri, eta Bad Sound taldeen kontzertua izango da leku berean. Sarrerek 5 euro balio dute eta azaroaren 4an izango dira salgai Niessengo leihatilan. Kontzertua entsegu gelan izango denez, lekuak mugatuak dira.
Asanbleario, horizontal eta autogestionatua
Udazkenarekin sortu zen, eta modu asanbleario, horizontal, militanteekin eta modu autogestionatuan egin du aurrera 35 urtez. Zaila dirudien arren, borroka politiko eta sozialak pil-pilean zeudenean sortutako irrati libreak, hasierako filosofia eta oinarriei eutsita bete ditu aurten 35 urte, eta lanean jarraitzeko prest datoz, sinistuta inoiz baino beharrezkoagoak direla halako proiektuak, “manipulazioa informatiboak eta kontrol sozialak inguratzen gaituelako, eskrupulorik gabeko kapitalistek maneiatutako sare sozialetan murgildurik gauden bitartean eta faxismoa zabaltzen den bitartean”.
Herriko irratia herriarentzat, hori da Zintzilik proiektuaren atzean dauden militante aseezinen esanetan, “herriko talde askoren ahotsa izan da, ehunka lagun eta belaunaldi desberdinek osatua”. Bidean, arazo ekonomiko eta teknikoak, bidean gelditutako kideak, instituzioen mehatxuak, poliziaren errepresioa pairatu dutela diote, baina ongi egindakoak, barreak, lagunak, esperimentazioa, festa, kontzertu eta madalenak balantzaren alde positibora eraman dute zalantzarik gabe bizi esperientzia, “hutsegite, eztabaida, geldiune eta barne krisiak ere izan ditugu”; denek egin dute bere ekarpena.
Zintzilik irratiak gizartearen indibidualizazioa eta militantzia zein konpromisoaren jaitsiera jasaten duen kolektiboetako bat dela nabarmendu dute, “hala ere, inoiz baino beharrezkoagoa da eta horretan jarraituko dugu hari batetik zintzilik urte askoz”.
