Elkarlanaren Gau Beltza izango da San Pedrokoa
San Pedroko hainbat eragilek bat egin dute ostegunean Gau Beltzak tartea izan dezan Pasaiako barrutian. Aurretik, ikastaroa jaso dute antolatzaileek.
San Pedroko Gau Beltzaren artxiboko irudia. Aurten ere ez da faltako Gau Beltza San Pedron. Elkarlanaren bidetik dator, gainera. Barrutiko Jai Batzordearen, Proisako Familia eta Haur Txokoaren, Udal Liburutegiaren eta San Pedroko Antzerki Taldearen arteko elkarlanaren emaitza izango dira hilaren 31ko jarduerak. Baina bada gehiago.
Honakoa da egitaraua:
Hilak 29, asteartea
- 17:30ean, udal liburutegian, ipuin kontaketa: Apika Taldeko kideek Sorginak ipuina kontatuko dute. Ondoren, mozorro eta makillaje tailerra egingo dute.
Hilak 31, osteguna (Gaur Beltzaren eguna)
- 18:00eta, frontoian, kalabaza tailerra. Gainera, Hiru T’erdiren eskutik, gaileta tailerra.
- 19:30ean, ‘Gure antzinekoen bisita’ plazan, eta ikuskizuna. Ondoren, Kale Zaharreko arimak uxatu, eguzki-loreak zintzilikatu, eta gaztaina erreak nahiz sua Torrean.
Lanketa egin dute
Gaur Beltzaren inguruan San Pedron antolatu dituztenek badute oinarria. Izan ere, Jai Batzordeko zenbait kidek irailean Udako Euskal Unibertsitateak Gau Beltzaren gainean antolatutako ikastaroan parte hartu zuten, Pasaiako Udaleko Euskara Batzordearen laguntza baliatuz. Handik ideia eta material ugari eskuratu zutela jakinarazi dute batzordekideek, baita beste herrietako esperientzien berri izan ere: “Aportazio ezin hobea jaso genuen festarekin landu beharreko baloreen inguruan, eta mila ideia ekarri genituen herrira”.
Irailetik hona ez dute tarte handirik izan Gau Beltzaren gainean jasotako formazioari etekin handiena ateratzeko, baina hala ere, egunotan egingo dutena bat dator Euskal Herriko hainbat herritan planteatzen hasi diren festaren berreskurapen edo berrasmaketarekin, antolatzaileek zehaztu dutenez.
Ekitaldien antolatzaileek Larraitz Burlada San Pedroko liburutegiaren arduradunaren, eta Judith Povesen nahiz Iker Etxarriren (San Pedroko Anzterki Taldekoak) laguntza eskertu dute.
